Արամ Սարգսյանը՝ հնարավոր նոր Հոկտեմբերի 27-ի, պարտության եւ ընտրությունների մասին
Երեկ Եռաբլուրում վարչապետ Նիկոլ Փաշինյանին «զենքով ֆիզիկապես վերացնելու», «ճիպոտով հեռացնելու» հայտարարություններ էին հնչում:
Այս առնչությամբ «Առավոտի» հետ զրույցում «Հանրապետություն» կուսակցության նախագահ Արամ Սարգսյանը հարցին՝ եթե վարչապետն իր կամքով լեգիտիմ ճանապարհով պաշտոնից չհրաժարվի, չե՞ք գտնում, որ կարող է Հոկտեմբերի 27 կրկնվել կամ ի վերջո այլ ճանապարհներով նրան կարող են հեռացնել՝ պատասխանեց. «Նման բռնության, ահաբեկչության կոչեր անողներին, անկախ նրանից, թե ով է այդ մարդը, պետք է պատասխանատվության ենթարկել: Մենք Հոկտեմբերի 27 ենք տեսել: Ես մշտապես ասել եմ, որ քաղաքական խնդիրները պիտի լուծվեն քաղաքական ճանապարհներով: Եվ բռնի ուժով լուծվող ցանկացած քաղաքական խնդիր իմ համար դատապարտելի է եղել՝ անկախ նրանից, թե բռնի ուժը կիրառել է իշխանությունը Մարտի 1-ին, թե՞ այդ բռնի ուժը կիրառել է, ասենք, «Սասնա ծռերը»՝ տարածք գրավելով: Ես դա քննադատել եմ: Ես տպավորություն ունեմ, որ մեր ժողովուրդը պատերազմից հետո եկել է ինքն իր մեջ դավաճաններ է ման եկել, ինքն իրեն սպանել է՝ հուրախություն հակառակորդի: Եթե կան մարդիկ, որ այդ գիծն ուզում են շարունակել, ես չէի ասի, որ այդ մարդիկ հայ ժողովրդի այն ընտրանին են, ովքեր պիտի որոշեն, թե ինչ պիտի անի ժողովուրդը»:
Հարցին՝ պատերազմը հարցեր է առաջացնում ու այդ հարցերի հետ հաշտ չես կարողանում ապրել, ձեզ մոտ հարցեր չկա՞ն այդ առումով, օրինակ, Շուշին անառիկ բերդ էր, հարց չի՞ առաջանում՝ ինչո՞ւ այդպես ստացվեց, որ Շուշին հանձնեցին հակառակորդին, Հադրութը հանձնեցին, կամ մյուս տարածքները՝ Արամ Սարգսյանը պատասխանեց. «Գիտեք, այդ հարցերին, որոնք առաջանում են, տարբեր մարդիկ տարբեր պատասխաններ են տալիս: Այդ հարցերը պետք է ամբողջական ուսումնասիրվեն՝ ամենայն մանրամասնությամբ: Նույն Շուշիի մասով, թե՛ որ հանձնվել է, թե՛ որ չի հանձնվել մինչեւ վերջին մարդը, ով որ դուրս է եկել ու եղբորս արձանի մոտից ինձ զանգել է, այս կարգի տեսակետներ կան: Ամբողջ խնդիրը նրանում է, թե դուք որին եք հավատում, ես որին եմ հավատում: Դուք ի՞նչ եք ուզում: Մեզ բոլորիս պետք է ճշմարտությունը, իսկ դա պետք է ոչ թե հիմա իրար միս ուտելով, իրար բզկտելով, այլ պետք է ռեալ մասնագիտական խմբեր լինեն, որոնք կուսումնասիրեն: Բազմաթիվ բաներ կան, որոնք կարող են նաեւ պետական գաղտնիք հանդիսանալ: Այսինքն, խնդիրը չի լուծվում լրատվական մակարդակով: Այսինքն ի՞նչ հարց եք տալիս ինձ՝ հետաքրքրո՞ւմ է… Իհարկե, հետաքրքրում է: Դուք բզբզում եք: Բզբզում եք ինչ-որ բանի համար, բզբզեք, քննադատենք այսօրվա իշխանությանը, նախկինին էլ, ինքներս մեզ էլ, հետո՞»:
Կարդացեք նաև
Երբ բացատրեցինք, որ հարցը քննադատելը չի, այլ՝ հստակություն մտցնելը՝ Արամ Սարգսյանն արձագանքեց. «Այդ հարցադրումներին անդրադարձել է թե՛ ընդդիմությունը, թե՛ Հաաստանի գործող վարչապետը: Ձեր իրավունքն է այդ հարցադրումներից որ մեկին հավատալ:
Եթե դուք ինձ հարցնում եք՝ ես ո՞ւմ եմ հավատում, ասում եմ՝ այդ հարցադրումները սպասում են իրենց պատասխանին: Ես դատավորը չեմ, չեմ մեղադրում: Ես էլ հարցեր ունեմ, այդ հարցերին սեփական մեկնաբանությունն ունեմ: Ես վստահաբար ասում եմ, որ մենք՝ 20-րդ դարի բանակը պարտվել է 21-րդ դարի բանակին: Գլոբալ խնդիրը դա է: Հայաստանի Հանրապետությունը պարտվել է Թուրքիայի պետությանը, որը 90 մլն է, Ադրբեջանի պետությանը, որը 10 մլն է: Մենք մեր հույսը դրել էինք ԵԱՏՄ-ի վրա, որն ավելի շատ Ադրբեջանի բարեկամն է, քան մեր վրա ու սխալ ենք արել: Ումի՞ց ենք այդ հույսը դրել՝ դա արդեն վերլուծության խնդիր է»:
Մեր հարցին՝ դուք պատրաստվում եք գնալ արտահերթ ընտրությանը՝ Նիկոլ Փաշինյանի առաջարկած ճանապարհային քարտեզով եւ օրակարգո՞վ՝ Արամ Սարգսյանը պատասխանեց. «Ինչո՞ւ եք մեզ կապում Նիկոլ Փաշինյանի հետ, ես չեմ հասկանում, այդ որտե՞ղ եք տեսել… Մենք մշտապես կողմնակից ենք եղել երկրում առաջացած ներքաղաքական խնդիրները լուծել քաղաքական ճանապարհով եւ ոչ թե հեղափոխությամբ կամ հեղաշրջմամբ: Հետեւաբար մենք գտնում ենք, որ եղած ներքաղաքական իրավիճակը կարելի է լուծել արտահերթ ընտրությունների միջոցով: Հիմա սպասում ենք, որ այդ արտահերթ ընտրություններն արվեն: Մենք նաեւ ասել ենք, որ արտահերթ ընտրություների միջոցով խնդիրը լուծելու օրինական ճանապարհը համարում ենք այն, որ ժողովրդի կամքով խորհրդարանում հայտնված երեք քաղաքական ուժերը կարողանան ընդհանուր հայտարարի գալ, որովհետեւ այս սոսկալի վատ Սահմանադրությամբ մի տարբերակ կա խորհրդարանը ցրելու: ՀՀԿ-ն մտածել է, որ ինքը հազար տարի մնալու է ու դրա ցրելու կարիքը չի առաջանա: Հիմա սահմանադրական հանրաքվեի եթե դրվի, մարդիկ չեն մասնակցելու, դա շատ բարդ խնդիր է: Նախ պիտի տեղի ունենան ընտրություններ, վերանա քաղաքական ճգնաժամը, այն, ինչ այսօր գոյություն ունի, որից հետո նոր եկած իշխանությունը, որը լրացուցիչ վստահություն արդեն կարող է ունենալ, միանշանակ արժի, որ փոխի Սահմանադրությունը եւ այս առումով մենք ամբողջական նախագահական կառավարման կողմնակից ենք: Այն ժամանակ էլ «Ելք» դաշինքում լինելով՝ ո՛չ Նիկոլ Փաշինյանի, ո՛չ Էդմոն Մարուքյանի տեսակետը չենք կիսել»:
Հռիփոիմե ՋԵԲԵՋՅԱՆ
«Առավոտ» օրաթերթ
29.01.2021
