Օրենսդրական փոփոխությունների արդյունքում Հայաստանում այսուհետ կհատկացվի նաև հայրության արձակուրդ: ՀՀ աշխատանքային օրենսգրքի 171-րդ հոդվածը վերաբերում է նպատակային արձակուրդների տեսակներին: Օրենսգրքում կատարված վերջին փոփոխությունների համաձայն՝ հոդվածում ավելացվել է նաև հայրության արձակուրդը: Օրենսգիրքը լրացվել է նաև 171.6 հոդվածով, որի համաձայն՝ երեխայի ծնվելու օրվանից հետո՝ 30 օրվա ընթացքում, նորածնի հոր ցանկությամբ տրամադրվում է հինգ աշխատանքային օր տևողությամբ վճարովի արձակուրդ, որի յուրաքանչյուր օրվա համար գործատուն վճարում է աշխատողի միջին օրական աշխատավարձի չափով:
Aravot.am-ը «Ֆեմինի» նախագծի շրջանակներում փոքրիկ հարցախույզ իրականացրեց՝ պարզելու ներկա և ապագա հայրիկներն ու մայրիկներն օգտակար համարո՞ւմ են այս փոփոխությունը:
Նրանց մեծամասնությունը կողմ է, որ հայրիկներին հնգօրյա արձակուրդ տրամադրվի, բայց նաև կարծում են, որ ճիշտ կլիներ՝ արձակուրդային օրերի թիվն ավելին լիներ: Մեծամասնության կարծիքով՝ այդ օրերը, որոնք հայրիկը կանցկացնի տանը՝ երեխայի և կնոջ կողքին, օգտակար կլինեն, որպեսզի հայրիկն ավելի կապվի իր ընտանիքին, երեխային և նաև զգա երեխայի խնամքի պատասխանատվությունը: Սակայն հայրիկներից որոշները կարծում են, որ դա իրենց կյանքում առանձնապես մեծ բան չի փոխի: Միջին տարիքի մի հայրիկ մեզ ասաց. «Այդ հինգ օրում ի՞նչ պիտի լինի: Մյուս կողմից էլ սենց թե նենց առաջին ամիսներին հիմնականում մոր գործերն են, ես ինչա, պիտի երեխա լողացնե՞մ, երեխա կերակրե՞մ: Լավ է, որ կարող ենք տանը մնալ, բայց դա մեծ բան չի փոխելու»:
Փորձեցինք պարզել՝ մասնագետնե՞րն ինչպես են գնահատում այս օրենսդրական փոփոխության արդյունավետությունը:
Կարդացեք նաև
Հոգեբան Եվա Օհանյանի կարծիքով՝ այս փոփոխությունն էական նշանակություն չի ունենա: Aravot.am-ի հետ զրույցում ասաց. «Դրանով ուզում էին խրախուսե՞լ, որ մարդիկ ծնող դառնային, երեխաները շատանային, հայրերը ավելի շատ շահագրգռված լինեին, որ երեխա ունենային կամ ավելի շատ երեխայի հետ մնար հայրը: Ընդամենը հինգ օրը ոչ մի էական նշանակություն չի ունենա: Իսկ խրախուսելու առումով նշեմ, որ եթե մարդը ներքուստ պատրաստ է, ինքը որոշել է ծնող դառնալ, ապա այդ հինգ օրվա վճարովի արձակուրդը բացարձակ իրեն այս կամ այն կողմ չի կողմնորոշի: Դա ոչ էական, հերթական ոչինչ չնշանակող փոփոխությունն է»:
Ըստ հոգեբանի՝ դա շատ քիչ ժամանակահատված է, որովհետև ընդհանրապես ինչ-որ սովորույթ ձևավորելու համար մարդուն 21 օր է պետք: Այնպես որ՝ ըստ Եվա Օհանյանի՝ այդ փոփոխությունը ֆորմալ բնույթ է կրելու:
«Մուրացան» համալսարանական հիվանդանոցային համալիրի անհետաձգելի բուժօգնության ծառայության բժիշկ, մանկաբույժ Աննա Մխիթարյանի կարծիքով՝ այս օրենսդրական փոփոխությունը միանշանակ շատ մեծ օգնություն կլինի նորածին ունեցող ընտանիքներին: Նա մանրամասնեց. «Դա կնպաստի հայրիկին լինել մայրիկի կողքին, երեխայի հետ ավելի շատ կապ ունենալ, պատասխանատվություն զգալու համար շատ ավելի ճիշտ կլիներ, եթե օրինակ 10 օր արձակուրդ հատկացվեր»:
Մեր հիշեցմանը՝ կարծիքներ կան, որ առանձնապես դա օգտակար չի լինի, որովհետև, միևնույն է, այդ առաջին ամիսներին ավելի շատ կանայք են զբաղվում երեխայի խնամքով, մանկաբույժն ասաց. «Հենց դրա համար, որ նման կարծիքներ կան, այս փոփոխությունն օգտակար կլինի, քանի որ նաև հայրը պետք է զգա պատասխանատվություն երեխայի նկատմամբ: Հատկապես հայ հասարակությունում շատ կարևոր է, որ հայրը ներգրավված լինի երեխայի խնամքի գործում»:
Տաթև ՀԱՐՈՒԹՅՈՒՆՅԱՆ
