ՀՀ քննչական կոմիտեի Լոռու մարզային քննչական վարչությունում ավարտվել է Վանաձոր քաղաքի բնակչի կողմից վաղեմի ծանոթի առողջությանը դիտավորությամբ ծանր վնաս պատճառելու դեպքի առթիվ հարուցված քրեական գործի նախաքննությունը:
Իրականացված քննչական և այլ դատավարական գործողությունների արդյունքում պարզվել են դեպքի հանգամանքները, շարժառիթը: Պարզվել է, որ գործով տուժողը, որը Վանաձոր քաղաքի բնակիչ է՝ 64 տարեկան, մարմնական վնասվածքները ստացել է համաքաղաքացի իր ծանոթի հետ վիճաբանության ժամանակ:
Մասնավորապես՝ նախաքննությամբ ձեռք բերված ապացույցներով պարզվել և հիմնավորվել է, որ տուժողը դեպքի օրը՝ 2020 թվականի նոյեմբերի 25-ին՝ ժամը 21:00-ի սահմաններում, իր վաղեմի ծանոթից պարտք գումարը պահանջելու նպատակով գնացել է վերջինիս պատկանող տնակ: Խոսակցության ժամանակ նույն տնակում գտնվող տուժողի մեկ այլ ծանոթը՝ 44-ամյա համաքաղաքացին, միջամտել է նրանց խոսակցությանը, ինչը վերաճել է վիճաբանության՝ ուղեկցված փոխադարձ հայհոյանքներով:
Քննությամբ տվյալներ են ձեռք բերվել այն մասին, որ 44-ամյա տղամարդը, 64-ամյա իր ծանոթի առողջությանը մարմնական վնասվածք պատճառելու դիտավորությամբ, նրան դուրս է հրավիրել բակ, որտեղ բռունցքով մեկ անգամ ուժգին հարվածել է վերջինիս քթի շրջանին՝ նրա առողջությանը պատճառելով ծանր, կյանքին վտանգ սպառնացող վնաս՝ ձախ ակնակապիճի վերին և միջին պատերի կոտրվածքների, աջից ճակատային ծոցի առաջային պատի բեկորային կոտրվածքի, աջ ակնակապիճի միջային և ստորին պատերի բեկորային կոտրվածքների, մաղոսկրի պատերի կոտրվածքների, աջից քթի ոսկրերի կողմնային բազմաբեկորային կոտրվածքների, աջից վերին ծնոտային խոռոչի հեմոսինուսի, քթի մեջքին՝ անցումով զույգ ակնակապիճների շրջանների արյունազեղման և արյունահավաքի ձևով:
Կարդացեք նաև
Ձեռք բերված բավարար ապացույցների համակցությամբ՝ 44-ամյա տղամարդուն մեղադրանք է առաջադրվել՝ ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 1-ին մասով: Նրա նկատմամբ որպես խափանման միջոց ընտրվել է ստորագրություն՝ չհեռանալու մասին:
Նախաքննությունն ավարտվել է, և քրեական գործը, մեղադրական եզրակացությամբ, ուղարկվել է դատարան:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
ՀՀ քննչական կոմիտեի տեղեկատվության
և հասարակայնության հետ կապերի բաժին
