«Հայկական ժամանակ»-ը զրուցել է Հայաստանի Ազգային հերոս, ՀՀ զինված ուժերի կապիտան Ռուբեն Սանամյանի հետ:
– Վերջին պատերազմի ժամանակ ադրբեջանցիները ապատեղեկատվություն էին տարածել ձեր մասին, եւ ձեր պատասխանը նրանց նշված ժամանակահատվածի տեղեկատվական նպատակը ոչնչացրեց: Ինչո՞ւ էին ձեր անունը շրջանառում:
– Գիտեք՝ այսօր ադրբեջանական բանակը մեծ շուքով տոնում է իր, այսպես ասած, «հաղթանակը», բայց դա ես չեմ համարում հաղթանակ: Իրենք չեն հաղթել, ես չեմ թերագնահատում նրանց զորքին, նրանք ինչպես կային, այդպես էլ շարունակում են լինել: Իրենց զինծառայողները ինձ լավ ճանաչում են, անգամ իմ վերնազգեստից էին փախչում: Իսկ հիմա նայեք նրանց կեցվածքին, նրանք մոռանում են, թե ով են: Բայց ոչինչ, կգա հատուցման օրը եւ ժամը, ամեն ինչ չի վերջացել:
– Վերջին 2-3 ամիսների ընթացքում բանակը կարողացե՞լ է վերլուծել կատարվածը եւ զբաղվել բացթողումներով ու թերացումներով։
Կարդացեք նաև
– Այնպես չԷ, թե կարող ես ունենալ 100 տոկոսանոց բանակ, որը ոչ մի թերություն չունենա: Ցանկացած բանակում կան թերություններ, որը պետք է ժամանակին հայտնաբերել եւ շտկել: Բայց գլոբալ՝ մեծ մասշտաբի թերություններ ես չեմ տեսնում:
– Նշում եք, որ կգա հատուցման օրը. ի՞նչ է պետք, որ Հայաստանը, հայ ժողովուրդը դարձյալ կարողանան խոսել հաղթողի դիրքերից:
– Պիտի լինել համախմբված, միահամուռ, եւ ինչքան շուտ լինի դա, այնքան շուտ մենք ոտքի կկանգնենք, այլապես Ալիեւը, որը ոչ մի անգամ չի կարողացել խոսել բարձր դիրքից, այսօր խոսում է. մենք պիտի այսօր այնքան համախմբվենք, որ նրա բարձր դիրքից խոսելը երկար չտեւի:
Բազմաթիվ գերտերություններ ժամանակին անգամ կապիտուլյացիայի են ենթարկվել՝ Գերմանիա, Ճապոնիա, բայց այդ երկրները կարողացել են իրենց մեջ ուժ գտնել, համախմբվել եւ այսօր զարգացած երկրներ են դարձել: Այսօր ամբողջ Եվրոպայի լծակը Գերմանիան է: Արդյոք մենք չե՞նք կարող մեր մեջ ներուժ գտնել, մեզ դաս չեղա՞վ, թե ինչպես անենք, որ մեր սխալները չկրկնենք, որ մեր սերունդները դրանք չկրկնեն: Չօգտվեցինք ուրիշի սխալներից, գոնե մեր սխալներից դասեր քաղենք, որ վաղը, մյուս օրը հասկանանք, թե ինչ ենք անելու եւ շուտ ոտքի կանգնենք:
Նիկոլայ ԱՎԵՏԻՍՅԱՆ
Հոդվածն ամբողջությամբ՝ «Հայկական ժամանակ» օրաթերթի այսօրվա համարում:
