Եվրոպայի խորհրդի խորհրդարանական վեհաժողովը (ԵԽԽՎ) ձմեռային նստաշրջանի լիագումար նիստի ընթացքում քննարկեց ԵԽԽՎ-ում ռուսական պատվիրակության լիազորությունների վերանայման հարցը:
Քվեարկության էր դրված «Էական մարտահրավեր՝ ԵԽԽՎ-ում ՌԴ-ի պատվիրակության՝ դեռևս չվավերացված հավատարմագրերի հարցում» խորագրով բանաձևը: Զեկույցի հեղինակն է ավստրիացի պատվիրակ Ստեֆան Շենախը:
Բանաձևում ամրագրված է. «Զեկուցողը ուշադրություն է հրավիրում Ռուսաստանի Դաշնությունում սուր բացասական միտումներին ժողովրդավարության, մարդու իրավունքների և օրենքի գերակայության հետ կապված, որոնք բացասական ազդեցություն են ունենում ՌԴ-ի ստանձնած հանձնառությունների իրականացման հարցում: Զեկուցողն իր մտահոգությունն է հայտնում քաղաքացիական հասարակության վրա ճնշումների, արտախորհրդարանական ընդդիմության ճնշումների, մամուլի ազատության հարցում»:
Բանաձևով ԵԽԽՎ-ն կոչ է անում Ռուսաստանին անհապաղ ազատ արձակել Ալեքսեյ Նավալնիին և կատարել խելամիտ հետաքննություն նրա թունավորման հետ կապված՝ համագործակցելով «Քիմիական զենքի արգելման կազմակերպության» հետ:
Կարդացեք նաև
Բանաձևում կա նաև մտահոգություն այն առիթով, որ ՌԴ գլխավոր դատախազությունը ԵԽ քաղաքական ուսումնասիրությունների դպրոցը ներառել է այսպես կոչված ոչ ցանկալի կազմակերպությունների ցուցակում:
Բանաձևում զեկուցողն առաջարկում է, որ Վեհաժողովը վավերացնի Ռուսաստանի Դաշնության պատվիրակների հավատարմագրերը և վերադառնա առաջընթացի գնահատմանը, երբ այս տարվա վերջին ներկայացվի մոնիտորինգի զեկույց:
Նշենք, որ Եվրոպայի խորհրդի խորհրդարանական վեհաժողովի մոնիտորինգի հանձնաժողովը խորհուրդ է տվել ամբողջությամբ հաստատել ԵԽԽՎ-ում Ռուսաստանի պատվիրակության լիազորությունները:
Քննարկման ընթացքում պատվիրակներից շատերը առաջարկություններ էին ներկայացրել, որ բանաձևում փոփոխություններ կատարվեն և չհաստատվեն ՌԴ-ի պատվիրակության լիազորությունները: Սակայն այդ առաջարկները մերժվեցին:
Ի վերջո, բանաձևը ձայների 107 «կողմ», 36 «դեմ» և 24 «ձեռնպահ» հարաբերակցությամբ ընդունվեց:
ԵԽԽՎ-ում հայկական պատվիրակության անդամներից քվեարկությանը մասնակցել են իմքայլական պատգամավորներ Տաթևիկ Հայրապետյանը, պատվիրակության ղեկավար Ռուբեն Ռուբինյանը, ԲՀԿ խմբակցության պատգամավոր Նաիրա Զոհրաբյանը և ԼՀԿ խմբակցության ղեկավար Էդմոն Մարուքյանը: Նրանք բոլորը «կողմ» են քվեարկել բանաձևին:
Տաթև ՀԱՐՈՒԹՅՈՒՆՅԱՆ
