Transparency International իրավապաշտպան կազմակերպությունը հրապարակել է իր ամենամյա «Կոռուպցիայի ընկալման համաթիվը 2020» զեկույցը, որում Հայաստանը բարելավել է իր ցուցանիշը՝ 49 միավորով հայտնվելով 69-րդ հորիզոնականում:
Նախորդ՝ 2019թ. զեկույցում Հայաստանը հավաքել էր 42 միավոր և գտնվում էր 77-րդ հորիզոնականում:
Տարածաշրջանի երկրներից Հայաստանից բարձր է միայն Վրաստանը, որը 56 միավորով զբաղեցնում է 45-րդ հորիզոնականը: Թուրքիան՝ 86-րդ տեղում է՝ 40 միավորով, իսկ Ադրբեջանը զբաղեցնում է 129-րդ հորիզոնականը (30 միավոր): Ընդ որում, Ադրբեջանն այդ հորիզոնականը կիսում է Ռուսաստանի հետ:
Վարկանիշային աղյուսակում ամենաչկոռումպացված երկրներն են Դանիան և Նոր Զելանդիան: Նրանց հաջորդում են Ֆինլանդիան, Սինգապուրը, Շվեդիան և Շվեյցարիան:
Կարդացեք նաև
Ընդհանուր առմամբ վարկանիշային աղյուսակում տեղ է գտել 180 երկիր: Այն չափում է կոռուպցիայի ընկալման մակարդակը պետական սեկտորում՝ հիմնված փորձագետների և ձեռնարկատերերի հարցումների վրա: Երկրները գնահատվում են 0-100 բալանոց սանդղակով, որտեղ 0-ն կոռուպցիայի ընկալման ամենաբարձր մակարդակն է, 100-ը՝ ամենացածր:
Պատրաստեց՝ Վիկտորյա ԱՆԴՐԵԱՍՅԱՆԸ
