Հայաստանի, Ադրբեջանի և Ռուսաստանի փոխվարչապետերի մակարդակով եռակողմ աշխատանքային խմբի առաջին հանդիպումը՝ ուղղված Լեռնային Ղարաբաղում տրանսպորտային և տնտեսական կապերի ապաշրջափակմանը, կարող է տեղի ունենալ առաջիկայում: Այս մասին հայտարարել են Ռուսաստանի ԱԳՆ-ից:
«Միջգերատեսչական մակարդակով հայկական և ադրբեջանական կողմերի հետ նախապատրաստական աշխատանք է ընթանում՝ առաջիկայում դրա առաջին նիստն անցկացնելու ուղղությամբ»,- ասել են ԱԳՆ-ից:
Գերատեսչությունից նշել են, որ Լեռնային Ղարաբաղի հակամարտության գործընթացում պատասխանատու ներգրավվածությունը եղել և մնում է Անդրկովկասում Ռուսաստանի ԱԳՆ արտաքին քաղաքականության առաջնահերթություններից մեկը:
«Արդիական հարց է ապահովել, որպեսզի տարածաշրջանի պետությունները դիմակայությունից անցնեն հաշտության՝ վերականգնելու բարիդրացիական հարաբերությունները, հաստատելու ազգամիջյան և միջդավանաբանական խաղաղություն և վստահություն, ձևավորելու ամուր պայմաններ՝ Հարավային Կովկասում կայունության և բարգավաճման համար»,- ասել են նախարարությունից:
Կարդացեք նաև
«Արմենպրես»-ի հարցմանն էլ ի պատասխան ՀՀ փոխվարչապետ Մհեր Գրիգորյանի գրասենյակից հայտնել են, որ Հայաստանի, Ադրբեջանի և Ռուսաստանի փոխվարչապետների հանդիպումը տեղի կունենա հունվարի 30-ին Մոսկվայում:
Պատրաստեց՝ Վիկտորյա ԱՆԴՐԵԱՍՅԱՆԸ
