Քիչ առաջ Երեւանի ընդհանուր իրավասության դատարանը՝ դատավոր Տաթեւիկ Գրիգորյանի նախագահությամբ հրապարակեց որոշումը. դատարանը մերժեց նախկին պատգամավոր Լեւոն Սարգսյանին (առավել հայտնի է Ալրաղացի Լյով անունով) խափանման միջոց կալանավորումը փոխելու միջնորդությունը: Լեւոն Սարգսյանի փաստաբանները միջնորդել էին իրենց պաշտպանյալին գրավի դիմաց ազատ արձակել, իսկ գրավի չափը որոշելը թողել էին դատարանի հայեցողությանը:
Լեւոն Սարգսյանին մեղադրանք է առաջադրվել այն բանի համար, որ նա մասնակցելով ՀՀ քաղաքացիներ Արա Կարապետյանի և Արմեն Նիկողոսյանի ստեղծած հանցավոր համագործակցությանը, առանձնապես խոշոր չափերով գույք հափշտակելու նպատակով պատվիրել և ղեկավարել է կազմակերպված խմբի կողմից 2008 թվականի հոկտեմբերի 27-ին ՀՀ ԿԱ մաքսային պետական կոմիտեի նախկին նախագահ Արմեն Ավետիսյանին պատկանող, Երևան քաղաքի Իսահակյան փողոցի թիվ 34 «բ» հասցեում գտնվող առանձնատան վրա ավազակային հարձակման կատարումը:
Լեւոն Սարգսյանը ձերբակալվել էր 2019 թվականի նոյեմբերին Ռուսաստանի Մոսկվայի մարզում, 2020 թվականի օգոստոսին արտահանձնվել Հայաստանի իշխանություններին:
Նելլի ԳՐԻԳՈՐՅԱՆ
