Եվրոպայի խորհրդի խորհրդարանական վեհաժողովը ձմեռային նստաշրջանի ընթացքում ընդունեց Մոնիտորինգային զեկույց, որտեղ անդրադարձ կա Հայաստանին և Ադրբեջանին, արցախյան 44-օրյա պատերազմին:
Մոնիտորինգային զեկույցում առանձին կետով անդրադարձ կա ԼՂ հակամարտությանը: Վեհաժողովը երկու երկրներին կոչ է անում զերծ մնալ հռետորաբանությունից, ինչը վնասում է քաղաքական երկխոսությանը: Մասնավորապես փաստաթղթում նշված է. «Վեհաժողովը կոչ է անում իրականացնել եռակողմ համաձայնագրի դրույթները և կատարել մարդասիրական հարցերին վերաբերող կետերը: Վեհաժողովը հորդորում է բոլոր կողմերին անհապաղ իրականացնել ռազմագերիների փոխանակում և զոհվածների մարմինների փոխանակում, հարգել մշակութային ժառանգությունը: Վեհաժողովը Մոնիտորինգի հանձնաժողովին կոչ է անում ուսումնասիրել ուղիներ ՝ խորհրդարանական մակարդակով նպաստելու խաղաղ գործընթացին նպաստող մթնոլորտին: Վեհաժողովն իր մտահոգությունն է հայտնում բոլոր կողմերի կողմից մարդասիրական և մարդու իրավունքների օրենսդրության խախտումների վերաբերյալ ինչպես նաև կրոնական օբյեկտներին, հուշարձաններին, ինչպես նաև մասնավոր սեփականությանը հասցված վնասի առիթով և կարևորում այս խախտումների հետ կապված հետաքննության իրականացումն ու հանցագործներին պատասխանատվության ենթարկելը»:
Մշտադիտարկման զեկույցի հեղինակը
Ըստ ԵԽԽՎ-ի զեկույցի՝ Հայաստանում առաջընթաց է գրանցել կոռուպցիայի դեմ պայքարում, փաստաթղթում դրական է համարվում ոստիկանության ուժերի բարեփոխումների՝ 2020-2022 թվականների ռազմավարության ընդունումը, ՀՀ ԱԺ-ի մտադրությունը՝ քաղաքական ֆինանսավորման թափանցիկությունը բարձրացնելու առիթով: Որպես դրական քայլ՝ ընդգծվում է նաև Սեռական շահագործումից և սեռական բռնությունից երեխաներին պաշտպանելու մասին ԵԽ կոնվենցիայի վավերացումը (Լանցարոտեի կոնվենցիա):
Զեկույցում ԵԽԽՎ-ն մտահոգություն է հայտնում ՀՀ ԱԺ նախագահ Արարատ Միրզոյանի նկատմամբ բռնության գործադրման փաստի առիթով: Փաստաթղթում մասնավորապես ամրագրված է. «Հայաստանի, Ադրբեջանի և Ռուսաստանի միջև 2020 թ. նոյեմբերի 9-ին ստորագրված եռակողմ հայտարարության ստորագրումից հետո Հայաստանում տեղի ունեցավ պետական հաստատությունների վրա հարձակում և ՀՀ Ազգային ժողովի նախագահի դեմ ֆիզիկական բռնություն: Այդ պատճառով նա հոսպիտալացվեց»:
Կարդացեք նաև
Մոնիտորինգային զեկույցում քննադատության են արժանացել նաև Հայաստանում առանց Վենետիկի հանձնաժողովի եզրակացության լիարժեք հաշվի առնելու Սահմանադրական դատարանի կազմի արագ փոփոխությունները:
Վեհաժողովը Հայաստանին կոչ է անում շարունակել ժողովրդավարական ուղին և հաղթահարել այն քաղաքական ճգնաժամը, որը երկրում առաջացել է եռակողմ համաձայնագրի ստորագրումից հետո:
Տաթև ՀԱՐՈՒԹՅՈՒՆՅԱՆ
