«Զերծ մնալով քննարկել տիկին Մակունցի դիվանագիտական հմտությունները, շատ կարեւոր է ասել՝ իշխանության բոլոր գործողություններն այս փուլում ցույց են տալիս նրա ոչ ադեկվատ վերաբերմունքը։ Բացի այդ, դեսպան նշանակելով կամ նշանակելով չի։ ԱՄՆ-ն առանցքային պետություն է, որտեղ ընտրություններ եղան, եկան դեմոկրատները։ Ի՞նչ է ուզում անզոր իշխանությունը սրանով փոխել»,-լրագրողների հետ զրույցում այսօր անդրադառնալով «Իմ քայլը» խմբակցության ղեկավար Լիլիթ Մակունցի հաստատմանն այն մասին, որ քննարկվում է իր՝ ԱՄՆ-ում ՀՀ դեսպան նշանակվելու հարցը՝ ասաց «Բարգավաճ Հայաստանի» պատգամավոր Արման Աբովյանը։
Նրա խոսքով՝ բոլոր գործողությունները ցույց են տալիս, որ իշխանությունը ոչ ադեկվատ է գնահատում իրավիճակը․ «ԱՄՆ-ում գործող հայկական լոբբիստական կազմակերպությունները, առանց որոնք որեւէ գործընթաց հնարավոր չի իրականացնել, խորը զարմանքով են վերաբերվել նշանակման փաստին։ Այդ խորը զարմանքն ամենալավ գնահատականն է»։ Արման Աբովյանի խոսքով՝ ինքը փորձում է հասկանալ այս սպասվելիք նշանակման իմաստը եւ նպատակը, բայց չի ստացվում։
Լուիզա ՍՈՒՔԻԱՍՅԱՆ
