«Երբ իշխանությունն ընդդիմությանը խնդիր է համարում, դա ամենամեծ գովասանքի խոսքն է։ Իսկ երբ իրարամերժ բաներ են խոսում, հիշեցնեմ, որ մենք խոսելու բան չունենք։ Արդեն ասել ենք՝ Նիկոլ Փաշինյանն ու իր իշխանությունը պետք է հեռանան»,-լրագրողների հետ ճեպազրույցում այսօր անդրադառնալով «Իմ քայլի» պատգամավոր Արփի Դավոյանի տեսակետին, թե ընդդիմությունն իրենից խնդիր է ներկայացնում եւ վերջինիս միակ նպատակը իշխանություն ստանձնելն է՝ ասաց «Բարգավաճ Հայաստանի» պատգամավոր Արման Աբովյանը։
Մեկնաբանելով տեղեկությունները, թե «Հայրենիքի փրկության շարժման» ներսում պառակտում կա, նա նշեց․ «Հավատացնում եմ, որ եթե փոփոխություն լինի, առաջինը մեզանից կիմանաք։ Գործընթացները կան, սեւ կատու մի փնտրեք, մանավանդ, որ այն չկա։ Կարեւոր է չտրվել այն գայթակղությանը, որն իշխանությունը փաթաթում է ժողովրդի վզին։ Իրենք փորձում են այս գործընթացը որպես զուտ քաղաքական գործընթաց ներկայացնել։ Սա աբսուրդ է: Երկիր ենք կորցրել եւ կորցնում։ Հազարավոր զոհեր, անտուն մնացածներ, գերիներ․․․ այստեղ փորձել իրավիճակը որպես դասական քաղաքականություն ներկայացնել՝ անընդունելի է։ Փաշինյանի հեռացումն ազգային տեսլական է»։
Լուիզա ՍՈՒՔԻԱՍՅԱՆ
