Այս ուտեստը շատերդ եք երեւի փորձել ու շատ հավանել: Բարեբախտաբար, այն ե՛ւ պատրաստելն է շատ հեշտ, ե՛ւ բաղադրիչներն արդեն կարելի է գտնել երեւանյան սուպերմարկետներում, այնպես որ կարելի է գնել եւ պատրաստել տան պայմաններում:
Անհրաժեշտ մթերքները
Բրնձի թղթեր-10-12 հատ
Բրնձի լապշա- 200 գրամ
Կարդացեք նաև
Վարունգ-1 հատ
Գազար-1 հատ
Թարմ կարմիր պղպեղ-1 հատ
Չինական կաղամբ- մի քանի տերեւ
Հազարաթերթիկ- մի քանի ճյուղ
Համեմ, կանաչ սոխ- մի քանի հատ, եթե գտնեք նաեւ բազիլիկ՝ եւս մի քանի ճյուղ
Սոյայի թանձրուկ-2 ճաշի գդալ
Բուսական յուղ -2 ճաշի գդալ
Ծովախեցգետին-200 գրամ
Հնդկական ընկույզ-15-20 հատիկ
Քունջութ-1 թեյի գդալ
Աղ, սեւ պղպեղ
Ինչպես նաեւ՝ թայլանդական քաղցրաթթու թանձրուկ կամ սոյայի թանձրուկ՝ թաթախելու համար
Պատրաստման եղանակը
Բոլոր բանջարեղենները լավ լվացեք: Եռացրած ջրի մեջ 2-3 րոպեով եփեք բրնձի լապշան եւ անմիջապես տեղափոխեք շատ սառը ջրով լի ամանի մեջ, որպեսզի եփը կանգնի, չլխկի:
Եթե ծովախեցգետինը սեփական հյութի կամ յուղի մեջ է, ոչ մի հավելյալ բան բան պետք չէ անել: Եթե թարմ է, պետք է 3-4 րոպեով եփել: Չեփված ծովախեցգետինները կանաչա-մոխրագույն են, իսկ վարդագույն ծովախեցգետինները նախապես եփված են: Եթե սառեցված է, բայց չեփված, նույնպես 4-5 րոպեով եփելու կարիք կա, եթե եփված-սառեցված է, պարզապես լցրեք եռման ջրի մեջ եւ սպասեք, որ թռնեն ջրի վրա: Եփելուց հետո մաքրեք պատյանից, ազատվեք պոչիկից եւ գլխիկից:
Վարունգն ու գազարը կարտոֆիլ կեղեւելու դանակով շատ բարակ շերտատեք:
Թարմ պղպեղը, չինական կաղամբը, կանաչ սոխն ու համեմը կտրատեք, խառնեք բրնձի լապշային, ավելացրեք քունջութը, բուսական յուղը եւ սոյայի թանձրուկը: Դառնում է աղցան: Կարող եք նաեւ առանց ձեթի եւ սոյայի թանձրուկի պատրաստել: Կարող եք պարզապես բոլոր մթերքները կտրատած դնել, եւ ապա՝ հերթով շարել բրնձի թղթի վրա:
Եռման ջուրը լցրեք խորը, լայնաբերան ամանի մեջ: Բրնձի թուղթն արագ մտցրեք այդ եռման ջրի մեջ եւ հանեք, չթողնեք երկար մնա, թե չէ կլխկի: Հանեք, դրեք հարթ տեղ, օրինակ՝ բանջարեղեն կտրատելու տախտակի վրա:
Շարեք ձեր ցանկացած մթերքները ձեր ցանկացած եղանակով բրնձի թղթի վրա եւ գլանաձեւ փաթաթեք ու տեղավորեք մատուցարանի վրա: Եթե վեգանների համար եք պատրաստում, բնականաբար, ծովախեցգետին կամ որեւէ այլ ոչ բանջարեղենային մթերք պետք չէ ավելացնել:
Աշխատեք գլանակները իրարից հեռու դնել՝ առնվազն մեկ մատ, քանի որ բրձնի թղթերը շատ կպչուն են, եւ եթե իրար հպվեն, ապա հետո չեք կարող առանձնացնել իրարից, կպատռվեն:
Բրնձի գլանակների համար ընդունված է գետնանուշի թանձրուկը, որի համար պետք է իրար խառնել գետնանուշի մածուկը, սոյայի թանձրուկը եւ հատուկ վիետնամական hoisin թանձրուկը, որը Հայաստանում չեմ գտել: Սակայն բրնձի գլանակները, ըստ իս, շատ լավ են համադրվում թայլանդական կամ չինական քաղցրաթթու թանձրուկի հետ, որի բազմազան տեսական է վաճառվում մեզ մոտ:
Պատրաստման մանրամասները՝ տեսանյութում.
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
