Երեւանի մի շարք վարչական շրջաններում այսօր «Հայրենիքի փրկության շարժման» նախաձեռնությամբ տեղի ունեցավ վարչապետ Նիկոլ Փաշինյանի հրաժարականի պահանջով ավտոերթ։
Մասնակիցները հասան Հանրապետության հրապարակ, որտեղից ոստիկանները նրանց արգելեցին ճանապարհը շարունակել՝ բարձրախոսով հայտարարելով, որ հրապարակում ազդանշաններով երթեւեկելն արգելվում է։
Քաղաքացիներից մեկը բղավեց, որ ոստիկանությունը հրաման է կատարում, որ ապօրինի է խոչընդոտում իրենց ավտոերթը․ «Ո՞ւմ հրամանն եք կատարում»։ Ոստիկանը պատասխանեց, որ ամեն ինչ օրինական է, եւ ինքն իր իրավունքներն ու պարտականությունները լավ գիտի։
Կարդացեք նաև
«Հայրենիք» կուսակցության անդամ Բաբկեն Հարությունյանը դժգոհեց, որ ոստիկանությունը որտեղ ուզի՝ առանց հիմք ներկայացնելու փակում է ճանապարհը։ Ոստիկանը պնդեց, որ ամեն ինչ օրենքով է եւ պետք չէ այլոց իրավունքները ոտնահարել․ «Եթե ոստիկանությունը նպատակահարմար է գտնում, որ դուք ձեք ավտոերթը պետք է շարունակեք Վազգեն Սարգսյան փողոցով, ուրեմն այդպես է պետք։ Այլապես ոստիկանությունը չի կարող ապահովել ձեր անվտանգությունը»։
Ի վերջո, ոստիկանության եւ ավտոերթի մասնակիցների միջեւ բանակցությունների արդյունքում ձեռք բերվեց պայմանավորվածություն, որ մասնակիցները կարող են ավտոերթը շարունակել Հանրապետության հրապարակում, բայց առանց ազդանշաններ հնչեցնելու։ Ի դեպ, երթի ընթացքում ճանապարհային ոստիկաններից մեկը տուգանեց մասնակից վարորդներից մեկին։
Լուիզա ՍՈՒՔԻԱՍՅԱՆ
