Վորլդ Վիժն Հայաստանը Գերմանիայի մարդասիրական կոալիցիայի (Aktion Deutschland Hilft) դրամաշնորհի շրջանակում Արցախից Հայաստան տեղափոխված 10020 ընտանիքի կտրամադրի բնաիրային աջակցություն:
Դրամաշնորհային ծրագրի բյուջեն կազմում է 475,000 ԱՄՆ դոլար, որը ներառում է մեծամասամբ բնաիրային աջակցություն Հայաստանում ապաստանած արցախցի ընտանիքներին: Ընտանիքներին կտրամադրվեն ծածկոցներ, խոհանոցային պարագաների հավաքածուներ, ինչպես նաև բաճկոններ:
Բացի այդ` դրամաշնորհի շրջանակում նախատեսվում է Վորլդ Վիժնի «Նավակ» երեխայի և ընտանիքի զարգացման համայնքային 10 կենտրոններում, որոնք գործում են Հայաստանի վեց մարզերում, ստեղծել հատուկ երեխաների համար նախատեսված խաղային անկյուններ, որտեղ Արցախից տեղափոխված 600 երեխաներ կկարողանան հետաքրքիր և ուսուցանող ժամանակ անցկացնել, ինչպես նաև ստանալ մասնագիտական ծառայություններ:
«Հակամարտության առաջին իսկ օրվանից Վորլդ Վիժն Հայաստանը վերակազմակերպել է իր ռեսուրսները` ուղղելով դրանք կամավոր կերպով Հայաստան ժամանած ընտանիքների կարիքներին: Միայն վերջին մի քանի շաբաթների ընթացքում Վորլդ Վիժն Հայաստանը գրանցել է աջակցություն ստանալու ավելի քան երեք հազար դիմում Հայաստան տեղափոխված արցախցիներից, ինչը հստակ ցույց է տալիս, որ աջակցության կարիքը դեռ մեծ է»,- նշում է Վորլդ Վիժն Հայաստանի Շահերի պաշտպանության և համագործակցության հարցերով խորհրդատու Գայանե Մարտիրոսյանը։
Կարդացեք նաև
Բնաիրային աջակցությունը տրամադրվում է Վորլդ Վիժնի գրասենյակներում և Երևանում Արցախի քաղաքացիների համար գործող սոցապսպասարկման օպերատիվ շտաբում:
Վերոնշյալ աջակցությունից բացի` մինչ այժմ Վորլդ Վիժն Հայաստանը օգնություն է տրամադրել 2431 ընտանիքի. ընդհանուր առմամբ նախատեսվում է աջակցություն տրամադրել ավելի քան 9000 ընտանիքի, որոնք Հայաստան են տեղափոխվել Լեռնային Ղարաբաղից, և/կամ ում տան միակ աշխատողը եղել է առաջնագծում։
Վորլդ Վիժն Հայաստան
