Aravot.am-ը ֆրանսահայ դերասան եւ ռեժիսոր Սերժ Ավեդիկյանից հետաքրքրվեց` իր «Վերադարձ Սոլոզ» ֆիլմի մասին տեղեկատվության մեջ ասվում է, որ այն ֆիլմ է ինքնության, պատմական ճշմարտության եւ հաշտեցման թեմաներով, եթե հաշվի առնենք այսօրվա Թուրքիայի հռետորաբանությունը` Հայաստանի վերաբերյալ, արդյոք այս համատեքստում տեղավորվո՞ւմ է իր պատկերացրած հաշտեցումը:
Սերժ Ավետիկյանն ասաց, որ չի ուզում նույնացնել Թուրքիան կառավարողներին թուրք ժողովրդի հետ. «Կառավարողները գիտեն, թե ինչ եմ մտածում իրենց մասին, որովհետեւ առանց թույլատրության եմ գնացել նկարելու «Վերադարձ Սոլոզը»: «Անատոլիական պատմությունը» եւս առանց թույլատրության գնացինք նկարելու, իսկ դա նշանակում է, որ մենք կառավարության հետ գործ չունենք, պետությունների հետ գործ չունենք, ունենք ընդդիմություն պետությունների հանդեպ` ասելով, որ իրենք շատ մեծ սխալներ են գործում, եւ իրենց մոտ դեմոկրատիա գոյություն չունի»:
Սերժ Ավեդիկյան
Ռեժիսորը հիշեցրեց. «Օսման Քավալան բանտում է, Օսման Քավալան ոչինչ չի արել, նա բանտում չէ նրա համար, որ իմ ընկերն է, նա բանտում է, որովհետեւ անում է այն, ինչ չի ուզում անել Էրդողանը: Իսկ Թուրքիայի ժողովրդի հանդեպ վարվել այնպես, ինչպես վարվում եմ էրդողանի հետ, անհնար է, որովհետեւ ժողովուրդը մնում է ժողովուրդ: Ժողովուրդը գուցե չգիտի, թե որտեղ է ճշմարտությունը, թուրք ժողովուրդը գիտի, որ իրեն խաբում են, բայց ինքը չգիտի, թե որտեղ է ճշմարտությունը: Իմ գործը իրեն ճշմարտություն նվիրելն է: Հաշտության հարցը դրանից է գալիս:
Ֆրանսերենով այդ բառը մի քիչ այլ է, նկատի ունեմ այն, որ պետք է սովորել մարսել այն թշնամությունը եւ վայրենությունը, որ եղել է ժամանակին, այն ժամանակ երիտթուրքերն են արել դա, հիմա նույնը Էրդողանն է անում: Չպետք ժողովրդին նույն անունը տալ, ինչ կառավարությանը: Սա հաշտություն չէ, այլ ավելի հոգեբանական բնույթի հարց է` ինչպես ապրել այն երկրի կողքին, որը քո թշնամին է, գուցե ժողովրդի հետ հնարավոր լինի ապրել, եթե իրեն հնարավորություն տաս իմանալ ճշմարտությունը: Երբ ես Թուրքիայում դահլիճում խոսում եմ, շատ է պատահել, որ մարդիկ նյարդայնացած դուրս են եկել, երբ գենոցիդ`ցեղասպանություն բառն եմ հնչեցրել: Ասում են` դուք իրավունք չունեք գենոցիդ բառը օգտագործել, ասում եմ, բայց ինչո՞ւ իրավունք չունեմ: Բացատրում եմ, թե ինչ է նշանակում գենոցիդ, եւ ինչպես է այն առաջին անգամ օգտագործել Լեմկինը, որը հրեաների ցեղասպանությունն էր ուսումնասիրում, բայց ուսումնասիրեց հայերի ցեղասպանությունը` հասկանալու համար, թե ինչ են անում նացիստները հրեաների հանդեպ: Սա պետք է հիշեցնել թուրքերին»:
Կարդացեք նաև
Գոհար ՀԱԿՈԲՅԱՆ
