ԲԴԽ անդամի թեկնածու Դավիթ Խաչատուրյանն այսօր ԱԺ-ում լրագրողների հետ ճեպազրույցում հարցին՝ վեթինգ պե՞տք է իրականացնել դատական համակարգում՝ պատասխանեց, որ դրա մասին կխոսի նիստում:
Ընդդիմությունը բոյկոտել է արտահերթ նիստը: ԲԴԽ անդամի թեկնածուն ասաց, որ դրան շատ լավ է վերաբերվում. «Իրենք կարող են մասնակցեն, կարող են չմասնակցել, իրենց լեգիտիմ դիրքորոշումն է»: Հարցին՝ դա ձեր լեգիտիմության վրա չի՞ ազդի, ընտրվելու դեպքում մի ուժ է մասնակցում՝ Խաչատուրյանը պատասխանեց. «Չէ, ընդդիմությունը չգիտենք՝ քվեարկելո՞ւ է, թե՞ ոչ: Եկեք, երբ չքվեարկեն, մի հատ էլ այդ հարցը կտաք: Չքվեարկելու փաստից հետո նոր կխոսենք: Կարող է հայտարարեն, որ քվեարկելու են, մենք ի՞նչ իմանանք»:
Հարցին՝ ընդդիմադիրները պնդում են, որ իշխանությունն իր համար ձեռնտու թեկնածուների է գործուղում ԲԴԽ, որպեսզի հետո ցանկալի արդյունք ունենա, ինչպե՞ս կարձագանքեք՝ նա պատասխանեց. «Ծառը ճանաչում են պտուղով: Պիտի աշխատենք, որ այդ պնդումները իմանաք՝ հիմնավոր են, թե ոչ: Ես էլ հակառակը կասեմ, բայց ժողովրդի մոտ ոչ մի հիմնավոր փաստեր չեն կարող լինել: Դա կանխագուշակում է, որ այսպես կլինի, ես էլ ասում եմ՝ այդպես չի լինի: Ով է ճիշտ՝ ոչ մեկը չգիտի»:
Լրագրողները հարցրեցին՝ կարծում եք, վնգստացող դատավորներ կա՞ն՝ Խաչատուրյանը պատասխանեց. «Չեմ ուզում քաղաքական կոնտեքստում ենթադրել: Այդ հարցը դուք տվել եք եւ ասվել է, որ կոնկրետ համատեքստում արված արտահայտություն էր, չեմ ուզում դրան պատասխանել, քաղաքական համատեքստում արված հայտարարություն էր»: Նա ասաց, որ քաղաքական հայտարարություն չի ուզում մեկնաբանել, քանի որ գնում է մասնագիտական աշխատանք կատարելու:
Կարդացեք նաև
Հարցին՝ հիմա դուք գնում եք մի համակարգ, որտեղ ձեր գործընկերներին այն քաղաքական թիմի ղեկավարը, որը ձեզ առաջադրել է, ասել է, որ պատերի տակ վնգստացող են, ԲԴԽ նախագահն էլ դրան ոչ մեղմ է անդրադարձել, դուք ո՞նց եք մոտենում՝ Խաչատուրյանը պատասխանեց. «Որ ասեն՝ մարդ է վնգստում, գնում եմ այնտեղ, տեսնեմ՝ մա՞րդ է վնգստում: Վարչապետը, թիմը, նկատի ունենք ֆրակցիան, որն առաջադրել է, ոչ թե նրա համար է անում, որ ինքը կարծում է վնգստացողներ կան, թե չկան, այլ՝ մասնագիտական գիտելիքների հմտությունների հիման վրա, ես այդպես գիտեմ»:
Հարցին՝ նորմա՞լ եք համարում, որ երկրի ղեկավարը նման բառապաշարով է արտահայտվում դատավորների մասին՝ Խաչատուրյանը պատասխանեց. «Եթե ասել է, ենթադրում եմ, ինչ-որ հիմքեր ունեցել է: Դա քաղաքական կոնկրետ իրավիճակում արված արտահայտություն է, չէ՞: Ես իրավունք չունեմ քաղաքական հայտարարությունները մեկնաբանելու»:
Լրագրողները ճշտեցին՝ ձեզ համար վիրավորական չէ՞, երբ ձեր գործընկերներին վնգստացող են ասում՝ Դավիթ Խաչատուրյանը պատասխանեց. «Իմ հասցեին մեկը ասի, ես կպատասխանեմ»:
Հռիփսիմե ՋԵԲԵՋՅԱՆ
