ՀՀ մարդու իրավունքների առաջին պաշտպան Լարիսա Ալավերդյանը այսօր իր մեկնաբանությունը տվեց, թե ինչու է գործող վարչակազմը թաքցնում Ադրբեջանում հայ գերիների իրական թիվը:
«Երբ նոյեմբերի 9-ին ստորագրվում էր պիղծ եռակողմ հայտարարությունը, այդ պահին դեռ թեժ մարտեր էին ընթանում եւ բազմաթիվ ջոկատներ գտնվում էին տարբեր վայրերում, որոնք այդ ստորագրությամբ եւ դրանից հետո բանավոր պայմանավորվածություններով անցան Ադրբեջանին: Այդ վայրերում գտնվում էին զինվորականները՝ ջոկատներ, նաեւ քաղաքացիական անձինք: Եվ այս որոշման մարդասիրության մասին խոսելը հանցագործություն է: Այսինքն, այդ տարածքները հանձնվել են՝ գրավոր, թե բանավոր, այդ մարդկանց հետ միասին: Գերիների եւ անհետ կորածների այսօրվա թվերը, որ ասում են, թե չգիտեն, դրանով է բացատրվում:
Բայց պետական մարմինները հենց պարտավոր են ու, կարծում եմ, գիտեն ոչ միայն թիվը, այլեւ այդ մարդկանց ցուցակը: Չէ՞որ այդ մարդիկ ուղարկվել են ցուցակով: Գերիների ու անհետ կորածների թիվը չի հրապարակվում, որովհետեւ նախ եւ առաջ հարցեր են ծագելու. բա ինչո՞ւ էք հանձնել՝ չպահանջելով մի քանի օր, կամ երկու շաբաթ, որպեսզի զինվորները եւ քաղաքացիներն այդտեղից դուրս գան: Ե՞րբ են Հադրութից 62 հոգի գերիներ հայտնվել Ադրբեջանում: Դեկտեմբերի 12-ին, այդ հայտարարությունը ստորագրելուց մեկ ամիս հետո: Այստեղ հարցերն այնքան ծանր են, պատասխանները՝ միայն, երևի, դատարանով ստացվող, որ գերիների իրական թիվը չհրապարակելու առաջին պատճառներից մեկը չարժեհամակարգի համար հենց դա է»,-ասաց տիկին Ալավերդյանը:
Աշոտ ՀԱԿՈԲՅԱՆ
