«Մեր թիմի ներսում մշտապես տեղի են ունենում բուռն քննարկումներ։ Բայց գոնե այս պահի դրությամբ թիմի ներսում կա կոնսենսուս, որ Նիկոլ Փաշինյանն այն ղեկավարն է, որը կարող է շարունակել բանակցությունները»,-լրագրողների հետ զրույցում այսօր հայտարարեց «Իմ քայլի» պատգամավոր Հրաչյա Հակոբյանը։
Նկատառմանն ի պատասխան, որ գերիների հարցը չի լուծվել, Հրաչյա Հակոբյանը նշեց․ «Այդ հարցը դուրս չի եկել օրակարգից։ Չի կարելի պնդել, որ չի լուծվել, որովհետեւ գործընթաց կա։ Ժամկետներ չեմ կարող նշել։ Դա շատ բարդ ու նուրբ թեմա է։ Թույլ տանք կառավարությանն ու պատկան մարմիններին իրականացնել այն»։
Հակոբյանը նաեւ հիշեցրեց Փաշինյանի այն խոսքը, որ պատերազմի առնչությամբ քննություն է իրականացվելու, եւ բոլորը պատասխան են տալու։
Ինչ վերաբերում է ներքաղաքական օրակարգին, Հրաչյա Հակոբյանը տեղեկացրեց, որ քաղաքական ուժերի հետ խորհրդակցությունները շարունակվում են։ Լրագրողները հետաքրքրվեցին՝ «Իմ քայլից» կլինե՞ն պատգամավորներ, որոնք կողմ կքվեարկեն վարչապետի թեկնածու Էդմոն Մարուքյանի օգտին»։ Հրաչյյա Հակոբյանը պատասխանեց․ «Չեմ կարծում, որ խմբակցությունում կան նման պատգամավորներ։ Եթե անգամ լինեն, ապա շատ քիչ են։ Հիմա ոչինչ չեմ կարող բացառել։ Եթե լինեն՝ մեկ կամ երկու հոգի»։
Կարդացեք նաև
Լրագրողները նաեւ հարցրին՝ «Իմ քայլի» պատգամավոր Հայկ Սարգսյանի վարքագիծը քննության առարկա դարձե՞լ է, էթիկայի հանձնաժողով կստեղծվի՞։ Հրաչյա Հակոբյանը նկատեց՝ մինչեւ Հայկ Սարգսյանին հասնելն ընդդիմության որոշ պատգամավորների վարքը պետք է քննության առարկա դարձնել։ Հիշեցնենք, որ Հայկ Սարգսյանը խորհրդարանում խլել էր լրագրողներից մեկի խոսափողը։
Ինչ վերաբերում է ԱԺ փոխնախագահ Լենա Նազարյանի պնդմանը, թե Արցախում կորցրած տարածքները պետք է վերադարձնել ոչ թե պատերազմով, այլ քաղաքականությամբ, Հրաչյա Հակոբյանն ասաց․ «Մի բանում եմ վստահ՝ ինչպիսի մարտավարություն էլ մենք որդեգրենք, պետք է զինվենք, հարստանանք, լինենք հարուստ երկիր»։
Լուիզա ՍՈՒՔԻԱՍՅԱՆ
