Խոսքի ազատության պաշտպանության կոմիտեի նախագահ Աշոտ Մելիքյանը խիստ հիասթափված է հեռուստաընկերությունների հաճախականությունների մրցույթի արդյունքներից: Ըստ նրա՝ այս մրցույթի արդյունքներով հայաստանյան եթերը չի մաքրվելու:
«Մեդիա կենտրոնում» հրավիրված քննարկման ընթացքում Աշոտ Մելիքյանը նկատեց. «Մեզանում հեռուստատեսության և ռադիոյի հանձնաժողովը 2002-ից սկսած հղում է կատարել և իր որոշումները կայացնելիս միշտ ասել է, որ հետևել են օրենքի պահանջներին: Ես կարծում եմ՝ այդպես էլ հղում կատարելով վատ օրենքին, ժամանակին եթերից զրկվեց «Ա1+» հեռուստաընկերությունը, իսկ հիմա, հղում կատարելով վատ օրենքին, մենք ունենալու ենք շատ վատ եթեր»:
Ըստ Աշոտ Մելիքյանի՝ նույնիսկ վատ օրենքի հնարավորությունը չի օգտագործվում, որ գերական լինի հանրային շահը, եթերը զերծ լինի վիրավորանքից, ատելությունից և այլն: Ըստ նրա՝ այս տեսակի մրցույթներն ավելորդություններ են և դրա անհրաժեշտությունը չկա:
Աշոտ Մելիքյանը խոսեց մրցույթում իր համար անհասկանալի դրվագների մասին: Նա մանրամասնեց. «Ինձ համար այս մրցույթում ամենաանհասկանալին է, ինչպես Արմավիրի մարզում տասնամյակներ շարունակ գործող հեռուստաընկերությունը, որը շատ թե քիչ արդեն կայացած էր և 2010-ին անարդար կերպով լիզենզիա չստացավ, այս մրցույթում էլ չստացավ լիցենզիա, և գերադասեցին անհայտ ընկերություն, որը չգիտես՝ ինչ պատճառով շատ ավելի բարձր գնահատական ստացավ»:
Կարդացեք նաև
Աշոտ Մելիքյանը նշեց՝ համոզված էր՝ գոնե այս հանձնաժողովը հաշվի կառնի գործող հեռուստաընկերությունների այն գործողությունները, որոնք չեն համապատասխանում օրենքին, լրագրողական էթիկայի կանոններին, և դա լուրջ գնահատականի կարժանանա: Սակայն ըստ Աշոտ Մելիքյանի՝ դա չտեսանք, և նա լուրջ կասկածներ ունի օբյեկտիվության առումով:
Հիշեցնենք՝ մրցույթի արդյունքում լիցենզիա չտրամադրվեց Հայկական երկրորդ հեռուստաալիքին և «Ա1+»-ին: Այս առիթով Աշոտ Մելիքյանն ասաց. «Հայկական երկրորդ հեռուստաալիքի պարտվելը երբ համեմատում ենք լիցենզիա ստացած մի քանի հեռուստաընկերությունների գործունեության հետ, ուղղակի տարակուսանք է առաջանում էթիկայի և մնացած այլ բաղադրիչների առումով: Այս պայմաններում ինձ մոտ տպավորություն է ստեղծվում՝ հանձնաժողովը աշխատել է տրամադրել լիցենզիաներ բոլոր այն հեռուստաընկերություններին, որոնք ասոցացվում են տարբեր քաղաքական ուժերի հետ: Ինձ մոտ տպավորություն է ստեղծվում, որ փորձ է արվել հավասարապես պահպանել տարբեր քաղաքական ուժեր հետ ասոցացվող հեռուստաընկերություններին լիցենզիա տրամադրելը: Հեռուստաեթերում ստեղծված իրավիճակը փաստորեն ձեռ է տալիս այս իշխանություններին»:
Տաթև ՀԱՐՈՒԹՅՈՒՆՅԱՆ
