«Հայաստանը ռուսական շուկա գնացքներ ուղարկելու անհրաժեշտություն չունի»,- «Հայելի» մամուլի ակումբում լրագրողների հետ հանդիպման ընթացքում, անդրադառնալով Հայաստանի և Ադրբեջանի միջև երկաթուղային հաղորդակցության վերականգնմանը, ասաց Հայաստանի նախկին վարչապետ Խոսրով Հարությունյանը։
Նրա խոսքով՝ Հայաստանից Ռուսաստան փոխադրվող ապրանքները հիմնականում «պրեմիում» դասի են, որոնք բավականին թանկ են, և տրանսպորտային ծախսերը թանկ չեն․ «Մի կողմից այս երկաթգիծը մեզ պետք չէ, որովհետև մենք այսպես ապրանք չենք ուղարկելու։ Ուղևորահոսքերի համար ուղղակի անհասկանալի է, որովհետև եթե Երևանից փորձեք Բաքվով գնալ Մոսկվա, կտևի 3 օր։ Մենք Վրաստանով գնում էինք, կազմում էր 2 օր-2.5 օր։ Այս սխեմայից շատ հարմար օգտվելու է ինքը՝ Ադրբեջանը։ Էլ չեմ ասում, որ Մեղրիի հատվածի վերահսկողությունը մենք, ըստ էության, նոյեմբերի 9-ի համաձայնագրով թողել ենք Ռուսաստանին։ Այսինքն՝ դուրս է գալիս այս երկաթգիծը մեզ պետք չէ, մենք չենք օգտագործելու դա, բայց դրանով մենք հնարավորություն ենք տալիս Նախիջևանին և Ադրբեջանին միանալ հենց Սյունիքով»։
Խոսրով Հարությունյանը նկատեց, որ նախկինում ապաշրջափակման մասին խոսելիս նկատի էին ունենում նաև երկաթգծի վերականգնումը Հայաստանի և Թուրքիայի միջև՝ Գյումրիից Կարս, սակայն այսօր ծրագրում այդ մասին ոչինչ չկա. «Թուրքիան ընդհանրապես չի ուզում իր բեռնափոխադրումը Հայաստանի վերահսկողության տակ իրականացնել։ Որևէ մեկը կարո՞ղ է ինձ ասել, որ այս ամենը բխում է մեր տնտեսական անվտանգությունից։ Ո՛չ։ Եթե մենք խոսում ենք ապաշրջափակման մասին և ենթադրում ենք, որ դա ապահովելու է կողմերի համար հավասար հնարավորություններ տնտեսական անվտանգության տեսանկյունից, հետևաբար՝ կողմերը պետք է ունենան հավասարակշռված կարողություններ՝ մեկը մեկին հակակշռելու։ Եթե մեր բեռները գնան, անցնելու են մոտավորապես 650 կմ, մի քիչ էլ ավել, իսկ նրանք ընդամենը 47 կմ»։
Ամի ՉԻՉԱԿՅԱՆ
Կարդացեք նաև
