Ադրբեջանի նախագահի «աննախադեպ ցինիկ» որակումները և մեկնաբանությունները, նպատակ են հետապնդում, որ բոլոր բանակցությունների ընթացքում ինքը հանդես գա հաղթողի դիրքերից։ Այս մասին «Հայելի» մամուլի ակումբում լրագրողների հետ հանդիպման ընթացքում ասաց Հայաստանի նախկին վարչապետ Խոսրով Հայրապետյանը։
Ըստ նրա, Հայաստանի, Ռուսաստանի և Ադրբեջանի ղեկավարների եռակողմ հանդիպումը ցույց է տվել, որ Ադրբեջանի նախագահ Իլհամ Ալիևին դա ստացվում է կատարել․ «Ինձ մոտ այն համոզմունքն է, որ Հայաստանի վարչապետը դոմինանտ դերակատարում չունի այդ բանակցություններում»։ Նա նշեց, որ մեծ սպասելիքներ ուներ գերիների վերադարձի հետ կապված, սակայն նման բան տեղի չունեցավ։
«Բոլոր նման ձևաչափի հանդիպումների օրակարգը ֆիքսվում է վաղօրոք և համաձայնեցվում կողմերի հետ։ Այնպես չէ, որ մենք կարող ենք պայմանավորվել երկու հարցի վերաբերյալ քննարկում ծավալել, բայց գնանք այնտեղ և ասենք՝ կներեք, մի հարցը մնաց օրակարգից դուրս։ Այդպիսի բան չի լինում։ Կարող են քննարկել, չգալ ընդհանուր հայտարարի։ Հարցը օրակարգից չի կարող հանվել, եթե վաղօրոք այդպիսի պայմանավորվածություն ձեռք չի բերել»,- ասաց Խոսրով Հարությունյանը։
Նա համոզված է, որ գերիների խնդիրը կարելի էր մի կողմ դնել միայն մեկ պարագայում․ «Երբ այդ հարցի քննարկման արդյունքում ձեռք բերված պայմանավորվածությունները անհամեմատ ավելի մեծ, կարևոր արդյունքներ կարող էին արձանագրել, այդ թվում նաև Հայաստանի համար։ Եվ երկրորդ՝ եթե այս պահին այդ քննարկումները չանեք, կարող եք ավելի շատ կորցնեք, քան հետագայում ավելի շատ վերականգնել»։
Կարդացեք նաև
Ամի ՉԻՉԱԿՅԱՆ
