«Նախ, ես չեմ կարող անվանել գործընկեր, որովհետեւ մենք իրար հետ չենք աշխատել։ Այո, նա ներգրավված է եղել մեր ցուցակում, բայց ես անձամբ նրան չեմ ճանաչել։ Կարծում եմ՝ «Իմ քայլը» խմբակցության մանդատը մեկ միասնական մանդատ է, որն առաջնահերթ տրվել է վարչապետ Նիկոլ Փաշինյանին»,-խորհրդարանում լրագրողների հետ զրույցում այսօր ասաց ԱԺ փոխնախագահ Ալեն Սիմոնյանը՝ անդրադառնալով պատգամավոր Աննա Գրիգորյանի՝ «Իմ քայլը» խմբակցությունից դուրս գալու հանգամանքին։
«Երբ դու հայտարարում ես, որ առանձնանում ես, որ դուրս ես գալիս, պետք է հասկանաս, որ քո լեգիտիմությունը որպես պատգամավոր այդքան էլ վստահելի չի։ Շատ մեծ հարց է՝ շատերը ներկայացված կլինեի՞ն ԱԺ-ում, եթե չլիներ Նիկոլ Փաշինյանը, իշխանությունը, որը հիմնական շարժիչ ուժն է եղել։ Լեգիտիմության խնդիր ունեն բոլոր այն պատգամավորները, որոնք լքել են «Իմ քայլը» խմբակցությունը։ Նրանք պետք է իրենց աշխատանքով ապացուցեն, որ քաղաքական առումով ընտրվել են։ Ես, անկեղծ, դրան չեմ հավատում»,-հավելեց Ալեն Սիմոնյանը։
Նա կասկածի տակ առավ Աննա Գրիգորյանի այն նկատառումը, որ ինքը հինգ հազարից ավելի ձայն է հավաքել Սյունիքում եւ Վայոց ձորում, եւ որ տեղացիներն իրեն լավ են ճանաչում։ «Դուրս եկած պատգամավորներից գեթ մեկը մեր համար անակնկալ չէ։ Շատերի հետ անհամաձայնություններ են եղել նաեւ մինչեւ պատերազմը»,-նշեց Ալեն Սիմոնյանը։
Կարդացեք նաև
Լուիզա ՍՈՒՔԻԱՍՅՍՆ
