«Ադրբեջանի նախագահը շարունակում է խորացնել հայատյացությունը: Սա հայատյացության պետական քաղաքականության դրսեւորում է: Ես ցանկանում եմ հիշեցնել, որ ՀՀ կառավարությունը 2 ամիս առաջ իրավական գործընթաց է սկսել Ադրբեջանի դեմ ռասսայական խտրականության բոլոր ձեւերի վերացման վերաբերյալ կոնվենցիայի շրջանակներում, որի առարկան այն է, որ հայատյաց քաղաքականությունը պետք է դատապարտվի եւ ավարտվի: Սա կարեւորագույն քայլ է, որ կառավարությունը սկսել է եւ ողջունելի է»,- այսօր ԱԺ նիստում հայտարարեց «Լուսավոր Հայաստան» խմբակցության պատգամավոր Տարոն Սիմոնյանը:
Նա բողոքեց պատգամավորների, իշխանականների անզգույշ մոտեցումներից ու բառապաշարից. «Կառավարության ներկայացուցիչները, իշխող քաղաքական ուժի ներկայացուցիչները տարբեր հանրային քննարկումներում այնպիսի արտահայտություններ են կատարում, որոնք ուղղակիորեն հակասում են կառավարության կողմից սկսած իրավական գործընթացին, որը մեր դեմ է օգտագործվելու: Մենք այս հարցը ՄԱԿ-ի արդարադատության միջազգային դատարանում պետք է բարձրաձայնենք: Բայց երբ որ կառավարության ներկայացուցիչը, կամ պատգամավորը կանգնում ու հայտարարում է, որ մենք պատրաստվում ենք Ադրբեջանի հետ բարեկամություն հաստատել, ճանապարհները բացել, առեւտուր անել, փող աշխատել, սա մեր դատական պրոցեսին հակասում է ու մեր դեմ է օգտագործվելու շատ շուտով: Ես էլ չգիտեմ սա ո՞նց բացատրեմ ձեզ, ստիպված այս ամբիոնից եմ ասում: Սա այս ամբիոնից ասելու բան չէ, ստիպված ասում եմ»:
Նա ասաց, որ եթե սա անում են՝ չգիտակցելով, գոնե խորհրդակցեն կառավարության իրավաբանների հետ, նոր հանրային խոսքում ճիշտ բառապաշար օգտագործեն, իսկ եթե իմանալով են դա անում, ապա դա ավելի մեծ աղետ է, քան կարելի է պատկերացնել:
Հռիփսիմե ՋԵԲԵՋՅԱՆ
