«Լուսավոր Հայաստան» խմբակցությունը ԱԺ պաշտպանության հանձնաժողովի նիստում քննարկման էր ներկայացրել «Զինվորական ծառայության եւ զինծառայողի կարգավիճակի մասին» օրենքում փոփոխություններ եւ լրացումներ կատարելու մասին նախագիծը: Խմբակցության պատգամավոր Գեւորգ Գորգիսյանը ներկայացրեց, որ այս նախագծով ուզում են ռազմական գործողության ժամանակ եւ խաղաղ պայմաններում անհետ կորած, գերի ընկած պայմանագրային զինծառայողների, զորահավաքային զորակոչով զորակոչված եւ կամավորագրված անձանց ընտանիքի անդամներին, ինչպես նաեւ գերի ընկած քաղաքացիական անձանց ընտանիքի անդամներին դրամական օգնություն տալ ու պետական նպաստ սահմանել:
Ըստ Գորգիսյանի, գործող իրավակարգավորումներով հարցերը հիմնովին չեն լուծվում, քանի որ անմեղության կանխավարկածն է խախտվում՝ նախ պետք է պարզեն՝ կամովին չի՞ հանձնվել ու ընկել գերի. «Ծառայողական քննությունից որոշ ժամանակ հետո նոր ծնողները կարող են դիմել դատարան, ճանաչել անհետ կորած ու 3-4 ամիս հետո նոր կարող են ստանալ պետական որեւէ աջակցություն, որը տվյալ պարագայում զինծառայողի աշխատավարձն է»:
Քաղաքացիական անձանց պարագայում որեւէ փոխհատուցում գործող օրենքով նախատեսված չէ: Իրենք առաջարկում են նպաստը, թոշակը տալ, քանի դեռ չի ապացուցվել հակառակը: Անհետ կորած զինծառայողների համար նախագծով առաջարկվում է 200 հազար դրամ միանվագ օգնություն տալ, իսկ քաղաքացիական անձանց պարագայում սահմանել նպաստ:
Կարդացեք նաև
Իմքայլական Արեն Մկրտչյանն ասաց, որ բացասական եզրակացություն են տվել, որովհետեւ ՊՆ-ից ճշտել են, որ մեխանիզմ արդեն սահմանված է ու պատշաճ գործում է: Մինչդեռ Գորգիսյանը ցույց տվեց, որ կառավարության որոշումներով հարցը հիմնովին չի լուծվում, նոյեմբերի 9-ից հետո գերի ընկած, անհետ կորածների հարազատներին փոխհատուցում չի տրվում:
Նախագիծը օրակարգ չմտավ:
Հռիփսիմե ՋԵԲԵՋՅԱՆ
