Այս թխվածքի յուրահատկությունը միջուկն է. սովորաբար խնձորով խմորեղենների մեջ համադրությունը խնձոր-դարչին է, այս դեպքում՝ խնձոր-նարինջ եւ կոճապղպեղ (имбирь): Հավատացեք՝ հրաշալի համ ու բույր ունեցող թխվածք է, պատրաստելն էլ՝ շատ հեշտ:
Անհրաժեշտ մթերքները
Շերտավոր խմոր- 400-500 գրամ
Խնձոր-8-10 հատ (ցանկալի է վերցնել սեմիրենկո կամ այլ կանաչ, ոչ փխրուն խնձոր)
Կարդացեք նաև
Շաքարավազ -1 բաժակ (ցանկալի է՝ եղեգնաշաքար, բայց սպիտակ շաքարով էլ կլինի)
Կարագ- 1 ճաշի գդալ
Նարինջ-1 հատ
Կոճապղպեղ-2-3 սմ-անոց կտոր
Կոնյակ (կամ՝ ռոմ, կալվադոս, նարնջի լիկյոր)- 50 մլ
Ալյուր-0,5 բաժակ՝ խմորը բացելու համար
Ձվի դեղնուց-1 հատ
Կաթ-1 ճաշի գդալ
Պատրաստման եղանակը
Մրգերը լավ լվացեք: Խնձորի կեղեւն ու միջուկը հեռացրեք, կտրատեք եւ լցրեք թավայի մեջ:
Ավելացրեք կարագն ու շաքարավազը եւ դրեք կրակին:
Պարբերաբար խառնեք, որ շաքարավազը հալչի, խնձորը կարամելացվի: Նարնջի կեղեւը քերեք ամենամանր անցքերով քերիչով: Զգույշ եղեք՝ չհասնեք սպիտակ թաղանթին: Կոճապղպեղի կեղեւը հեռացրեք, եւ նույնպես քերեք մանր անցքերով քերիչով: Նարնջի կեղեւն ու կոճապղպեղը ավելացրեք խնձորին, խառնեք, թողեք մի քիչ էլ եփվի:
Ավելացրեք կոնյակը (ես ավելացրել եմ կալվադոս՝ խնձորի բրենդի, որը, ի դեպ, արտադրում են Հայաստանում եւ շատ լավ որակ ունի, շատ հարմար է ինչպես խմորեղենների մեջ ավելացնելու համար, այնպես էլ՝ պարզապես ըմպելու) եւ անմիջապես լուցկին կամ կրակայրիչը մոտեցրեք խնձորին, որ կոնյակն այրվի (այդ պրոցեսը ֆլամբե է կոչվում):
Երբ կոնյակն ամբողջությամբ այրվի, անջատեք գազը եւ թողեք միջուկը սառչի:
Ջեռոցը տաքացրեք 220 աստիճան:
Խմորը գրտնակով բացեք, վրան մի քանի տեղ պատառաքաղով ծակծկեք: Խնձորի սառած միջուկը լցրեք խմորի մեջտեղը: Փաթաթեք գլանաձեւ, վրան քսեք ձվի դեղնուցի եւ կաթի խառնուրդը եւ դրեք ջեռոցը 20-25 րոպեով:
Կարող եք մատուցել ինչպես գոլ, այնպես էլ՝ լրիվ սառը վիճակում:
Պատրաստման նրբությունները եւ մանրամասները՝ տեսանյութում:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
