Ժամկետային զինծառայողների մի քանի ծնողներ այսօր առավոտից կառավարությունում հանդիպում էին վարչապետ Նիկոլ Փաշինյանի հետ, մյուսներն էլ սպասում էին գործադիրի շենքի դիմաց:
«Նախ արձանագրենք, որ վարչապետը գնաց ընդառաջ մեր հետ հանդիպման՝ կարեւորելով հարցի լրջությունը եւ լսելով մեր բարձրաձայնած խնդիրները: Այնպես չի, որ այդ խնդիրների մասին իրենք տեղյակ չեն, պարզապես մեր կողմից ինչ ահազանգեր որ կան, ուզում էր տիրապետել դրանց, մեր դիրքորոշումներին»,-հանդիպման ավարտին լրագրողների հետ զրույցում ասաց ժամկետային զինծառայողի ծնող Սուրեն Սահակյանը:
«Մենք վարչապետի հետ եկանք համաձայնության, որ մոտ ժամանակներս մի անգամ էլ հանդիպենք՝ մեր հարցերի պատասխանները ստանալու»,-հայտնեց ծնողը:
Կարդացեք նաև
Նա նշեց, որ իրենք բավարարված չեն, որովհետեւ հարցերի պատասխանների լուծման մասին խոսելը դեռ վաղ է:
«Մենք ընդհանուր խնդիրների շուրջ ենք խոսել: Առավել մանրամասն կհայտնենք հաջորդ հանդիպումից հետո, որն առաջիկայում կլինի»,-եզրափակեց Սուրեն Սահակյանը՝ չցանկանալով այլ մանրամասներ ասել:
Հավելենք, որ ծնողների մի մասը պահանջում է արձակուրդ տրամադրել ժամկետային զինծառայության մեջ գտնվող եւ պատերազմին մասնակցած իրենց որդիներին, մի մասն էլ՝ նրանց ծառայությունը կազմակերպել Հայաստանում:
Լուիզա ՍՈՒՔԻԱՍՅԱՆ
