Լեռնային Ղարաբաղում կրակի վերահսկման ռուս-թուրքական մոնիթորինգային կենտրոնը կտեղակայվի Աղդամում՝ շփման գծից 8 կմ հեռավորության վրա: Այս մասին հայտարարել է Թուրքիայի արտգործնախարար Մևլութ Չավուշօղլուն:
«60 թուրք, 60 ռուս զինվորականներ կվերահսկեն Լեռնային Ղարաբաղում կրակի վերահսկումը: Արդեն սկսվել է թուրք զինվորների տեղակայումն Ադրբեջանում»,- ասել է Չավուշօղլուն:
Նա նաև նշել է, որ անհրաժեշտության դեպքում երկկողմ բանակցություններ կանցկացվեն Ադրբեջանի հետ: «Մենք հետագայում էլ կշարունակենք Ադրբեջանի հետ գնահատել կրակի դադարեցման մասին հարցերը»,- ասել է Չավուշօղլուն:
Չավուշօղլուն նշել է, որ իրենք խրախուսում են Ռուսաստանին ստորագրել համաձայնագիր Արցախում խաղաղապահ ուժերի կարգավիճակի մասին: Նրա խոսքով՝ Ադրբեջանի կողմից որևէ բողոք չեն ստացել:
Կարդացեք նաև
«Հիմնական հարցն այն է, որ ռուս խաղաղապահները թույլտվություն են տալիս տեղաշարժվել Լաչինի միջանցքով: Դրա համար անհրաժեշտ է ստանալ Ադրբեջանի թույլտվությունը: Ղարաբաղն ադրբեջանական տարածք է: Եթե վաղը կսահմանվի ինչ-որ ստատուս քվո, ապա դա նույնպես կլինի Ադրբեջանի սահմանների շրջանակում: Ուստի չի կարելի դա անել առանց Ադրբեջանի թույլտվության: Մենք ասել ենք, որ «դուք ներկայացված եք որպես խաղաղապահներ, բայց լիազորված չեք որոշում կայացնել այն հարցում, թե ով կարող է ներսուդուրս անել»»,- ասել է Չավուշօղլուն:
Ըստ Չավուշօղլուին՝ Նախիջևանի միջանցքի հարցում նման խնդիր չի լինի: Ըստ նրա՝ դա հաստատվել է Մոսկվայում Ռուսաստան-Ադրբեջան-Հայաստան եռակողմ հանդիպմանը:
Պատրաստեց՝ Վիկտորյա ԱՆԴՐԵԱՍՅԱՆԸ
