Դեկտեմբերի վերջին մարզաշխարհի ներկայացուցիչների հետ հանդիպման ժամանակ Aravot.am-ը ԿԳՄՍ նախարար Վահրամ Դումանյանից հետաքրքրվել էր, թե 2021 թվականի օլիմպիական տարում սպորտի պետական կառույցը ի՞նչ կոնկրետ ծրագրեր ունի եւ օլիմպիական խաղերին ավելի լավ նախապատրաստվելու նպատակով ի՞նչ համագործակցություն կա ՀԱՕԿ-ի հետ: Ի պատասխան, նախարարն արձանագրել էր, թե եթե օլիմպիական տարի է, բառն արդեն ուղղորդում է, թե որտեղ պիտի այդ գործունեությունը եռա: Ուրեմն, սպասում են օլիմպիական կոմիտեի ակտիվ գործողություններին: Իսկ դիտարկմանը, թե ժամանակ չի մնում, նախարարը պատասխանել էր. «Ո՞վ է ասում ժամանակ չի մնում: Մի անհանգստացեք, ժամանակը բավարար է, ծրագիրը կկազմվի: Աստված տա՝ ազգի այսօրվա ամբողջ պրոբլեմը դա լինի: Ինչի՞ մասին եք հիմա դուք խոսում: Մեր վիճակը՝ ձեր շտապողականությունը: Չի կարելի կտրվել մեր իրականությունից: Կհասցնենք, մի անհանգստացեք… Աստված կտա, մի կասկածեք»:
Այսօր Aravot.am-ը ՀԱՕԿ գլխավոր քարտուղար Հրաչյա Ռոստոմյանից հետաքրքրվեց, թե օլիմպիական խաղերի մեկնարկին շատ քիչ ժամանակ է մնացել եւ սպորտի պետական կառույցի հետ համատեղ աշխատանք իրականացվո՞ւմ է: «ԿԳՄՍ-ում սպորտի գծով փոխնախարար բերել են Կարեն Գիլոյանին, մարդ, որը տիրապետում է ոլորտին, գիտի խնդիրները, մարդ, որը նաեւ լսել գիտի: Բայց հիմա այնպիսի վիճակում ենք, որ մտածում եմ՝ արժե՞ ասել, որ երկուսս էլ սպորտում ենք երկար տարիներ, մտերմություն ունենք եւ արդեն սկսել ենք համագործակցել ու ծրագրեր ենք նայում: Մտածում եմ, հանկարծ դրա համար գործից չհանե՞ն: Իսկ եթե լուրջ, Ես եւ Գիլոյանը ինչ էլ անենք, սպորտային առումով արդեն ուշացել ենք: Մտքից հանեք, թե մարզիկները կարող են հավաքներում երբեմնի լավագույն մարզավիճակ ձեռք բերել: Իսկ մարտ-ապրիլին, եթե գործ չարվի, մոռացեք մեդալների մասին: Սակայն, չնայած սրան, ՀԱՕԿ նախագահ Գագիկ Ծառուկյանը ինչպես միշտ, հիմա էլ պատրաստ է աջակցել մեր առաջատար մարզաձեւերին՝ Տոկիոյում հնարավոր առավելագույն հաջող մասնակցություն ունենալու համար»,-պատասխանեց Հրաչյա Ռոստոմյանը:
Աշոտ ՀԱԿՈԲՅԱՆ
