«Իշխանության հետ ընդհանուր օրակարգ չունենք նաեւ այդ դաշտում, որովհետեւ գիտակցված կամ անգիտակից անգրագետ քայլերը դիվանագիտական դաշտում տեսել ենք, եւ խոսքը կոնկրետ նախարարի մասին չէ, այլ առհասարակ: Իրենք չեն թողնում հնարավորություն՝ ինչ որ բան քննարկելու: Ի՞նչ քննարկենք»,-խորհրդարանում լրագրողների հետ ճեպազրույցում այսօր ասաց «Բարգավաճ Հայաստան» խմբակցության պատգամավոր Արման Աբովյանը:
Հիշեցնենք, որ ԱԺ արտաքին հարաբերությունների հանձնաժողովն այսօր հանդիպեց ԱԳ նախարար Արա Այվազյանին, եւ ընդդիմադիր խմբակցությունները ներկա չէին:
«Առկա բոլոր խնդիրները Նիկոլ Փաշինյանի քաղաքականության տրամաբանության մեջ են, եւ դա շարունակվում է, ուստի ի՞նչ քննարկենք: Պատերազմից հետո խոսեցին դիվանագիտական հարաբերությունների մասին: Մինչեւ օրս չեմ ստացել հարցիս պատասխանը՝ Թուրքիայի նախապայմաններից տեղյա՞կ են: Թուրքիայի նախապայմանը լինելու է ցեղասպանության հարցի բացառումը, ՀՀ-ի կողմից հայ դատի գաղափարների հրաժարումը: Եթե ՀՀ-ն գնա Թուրքիայի հետ դիվանագիտական հարաբերությունների հաստատմանը, Հայաստանի ոչնչացմանը դա կբերի: Վտանգը չտեսնելու համար կույր պետք է լինես: Նույնն էլ Ադրբեջանի առնչությամբ: Վերջինիս հետ դիվանագիտական հարաբերությունների հաստատումը կենթադրի նրա տարածքային ամբողջականության հարցի մեջբերում»,-շեշտեց Աբովյանը:
Նա հավելեց. «Իշխանական քարոզչամեքենան ցնցվելով գովազդում է ճանապարհների ապաշրջափակումը. «Ասում են, թե Ադրբեջանի տարածքով ճանապարհ կունենանք դեպի Ռուսաստան եւ Իրան: Կներեք, ի՞նչ եք խոսում, չէ՞ որ Ադրբեջանն ու Թուրքիան բաղձալի երազանքը կստանան՝ պանթուրանի իրականացումը, Նախիջեւանից Ադրբեջանի հետ միավորվելը: Այսինքն, պանթուրանական գոտին միավորվում է, որը կենսական վտանգ է ՀՀ-ի գոյության համար: Սա աշխարհաքաղաքական իրողություն է, ոչ թե ընդդիմության ասածը»:
Կարդացեք նաև
Լուիզա ՍՈՒՔԻԱՍՅԱՆ
