Լրահոս
Օրվա լրահոսը

ԱՄՆ նախագահ Դոնալդ Թրամփը դարձավ այդ երկրի պատմության մեջ առաջին նախագահը, որին արդեն երկրորդ անգամ իմփիչմենթ են հայտարարել

Հունվար 14,2021 10:50

ԱՄՆ նախագահ Դոնալդ Թրամփը դարձավ այդ երկրի պատմության մեջ առաջին նախագահը, որին արդեն երկրորդ անգամ իմփիչմենթ են հայտարարել: Սենատում, որտեղ պետք է հաստատեն այդ որոշում, խոստանում են, որ կքննարկեն այդ մեղադրանքը արդեն նոր նախագահի երդմնակալությունից հետո, հաղորդում է BBC-ն:

Չորեքշաբթի երեկոյան Կոնգրեսում կատարեցին իրենց խոստումը՝ հնարավորինս արագ Թրամփի դեմ իմփիչմենթի գործընթաց սկսելու վերաբերյալ: Ընդամենը մի քանի ժամում Ներկայացուցիչների պալատը քննարկեց և հաստատեց Թրամփի դեմ մեղադրանքի միակ հոդվածը՝ նրան մեղավոր հայտարարելով խռովություն հրահրելու մեջ:

Իմփիչմենթն ուժի մեջ մտավ այն բանից հետո, երբ փաստաթուղթը ստորագրեց Ներկայացուցիչների պալատի խոսնակ Նենսի Փելոսին: Սակայն վերջնական որոշումը պետք է ընդունի Սենատը:

Քննարկման ժամանակ Կապիտոլիումի շենքում էին տեղակայվել ԱՄՆ Ազգային գվարդիայի 15 հազար զինծառայողներ: Որոշ պատգամավորներ նկատեցին անգամ, որ այդ շենքում ավելի շատ ամերիկյան զորք կա, քան Իրաքում և Աֆղանստանում:

Կոնգրեսում բոլոր դեմոկրատների դիրքորոշումը նախապես հայտնի էր, և քվեարկության ժամանակ էլ կուսակցության գծից ոչ մեկ չշեղվեց: Մինչդեռ 10 հանրապետականներ շեղվեցին իրենց կուսակցության դիրքորոշումից՝ կողմ քվեարկելով Թրամփի իմփիչմենթին: Նրանց թվում էր Վայոմինգից Կոնգրեսի անդամ Լիզ Չեյնին, որը համարվում է Հանրապետականների հիերարխիայի երրորդ դեմքը:

Իմփիչմենթի փաստաթղթին կողմ են քվեարկել 232, դեմ՝ 197 կոնգրեսական, ևս 4-ը զերծ են մնացել քվեարկությունից կամ բացակայել են նիստից:

Արդեն քվեարկության ավարտից հետո Սենատում հանրապետական մեծամասնության ղեկավար Միտչ Մաքքոնելը հայտարարեց, որ Վերին պալատը չի կարող քննարկել Թրամփի դեմ մեղադրանքները նախքան հունվարի 20-ին սպասվող երդմնակալությունը:

«Անգամ եթե այս շաբաթ Սենատում սկսվի գործընթաց և արագ ընթանա, մենք չենք կարող վերջնական որոշում կայացնել նախքան Թրամփը կլքի պաշտոնը: Ե՛ս չեմ նման որոշումներ կայացնում, այդպիսին են փաստերը»,- ասել է նա:

Սպիտակ տանն առայժմ հրաժարվում են այս թեմայով որևէ մեկնաբանությունից:

Ինքը Թրամփը չորեքշաբթի գտնվում էր Սպիտակ տանը և ըստ որոշ տեղեկությունների, ուղիղ հեռարձակմամբ հետևել է իմփիչմենթի քննարկումներին: Ավելի ուշ նա Սպիտակ տան թվիթերյան էջում տեսաուղերձ է տեղադրել, որում կոշտ քննադատության է ենթարկել Կապիտոլիումի վրա հարձակումը:

«Բռնությունը և վանդալիզմը տեղ չունեն մեր երկրում և մեր շարժման մեջ,- ասել է նա:- Աջ եք դուք, թե ձախ, դեմոկրատ, թե հանրապետական՝ բռնությունն արդարացում չունի: Ո՛չ մի արդարացում: Ամերիկան օրենքների երկիր է: Նրանք, ովքեր անցյալ շաբաթ մասնակցել են այդ հարձակմանը, պատասխանատվության կենթարկվեն»:

Նրա խոսքով՝ գաղտնի ծառայություններից իրեն հայտնել են, որ առաջիկայում նոր ցույցեր են սպասվում Վաշինգտոնում և երկրի այլ հատվածներում: «Յուրաքանչյուր ամերիկացի իրավունք ունի, որպեսզի իր ձայնի լսելի լինի, բայց հարգալից, խաղաղ ճանապարհով… Բայց ես ընդգծում եմ, որ չպետք է լինի բռնություն, օրենքի խախտում և ցանկացած տեսակի վանդալիզմ: Յուրաքանչյուրը պետք է հետևի օրենքին և ենթարկվի իրավապահների հրահանգներին»,- ասել է Թրամփը:

Ուշագրավ է, որ իր ելույթում նա որևէ կերպ չի հիշատակել Ներկայացուցիչների պալատի՝ իմփիչմենթի որոշումը:

 

Պատրաստեց՝ Վիկտորյա ԱՆԴՐԵԱՍՅԱՆԸ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հունվար 2021
Երկ Երե Չոր Հնգ Ուրբ Շաբ Կիր
« Դեկ   Փետ »
 123
45678910
11121314151617
18192021222324
25262728293031