Հավաքականի գլխավոր մարզիչ Հովհաննես Դավթյանը Aravot.am-ին տեղեկացրեց, որ ընդհանուր ֆիզպատրաստության որակների բարձրացմանը նվիրված հավաքի մեկնարկը նախատեսված էր հունվարի 15-ին, սակայն տեխնիկական պատճառներով ժամկետը մի փոքր հետաձգել է: Նաեւ հավելեց, որ միջազգային առաջին մեկնարկը կլինի փետրվարի 18-ին մեկնարկող Թել-Ավիվի օլիմպիական վարկանիշային մրցաշարը:
«2020 թվականին վրա հասած կորոնավիրուսը եւ պատերազմը գրեթե ամբողջությամբ խառնեցին մեր ծրագրերը: Լավ էր, որ դեկտեմբեր ամսին կարողացանք Օլիմպավանում 15-օրյա հավաք կազմակերպել, ինչը դրական ազդեց մեր տղաների մարզավիճակի պահպանման վրա: Տարին շատ ծանրաբեռնված է լինելու: Ունենք 4-5 վարկանիշային մրցաշար, մինչեւ օլիմպիական խաղերը՝ Եվրոպայի եւ աշխարհի առաջնություն: Մեր գլխավոր հույսը Ֆերդինանդ Կարապետյանն է: Օլիմպիական խաղերում յուրաքանչյուր քաշային կարգում հանդես են գալու 36 լավագույնները, սակայն մեր պարագայում ուղեգիր նվաճելու համար մարզիկից պահանջվելու է իր քաշային կարգում տեղ զբաղեցնել Եվրոպայի 13 լավագույնների մեջ»,-ասաց գլխավոր մարզիչը:
Աշոտ ՀԱԿՈԲՅԱՆ
