Այսօր ԱԺ պետաիրավական հարցերի հանձնաժողովի նիստում «Լուսավոր Հայաստան» խմբակցության ղեկավար Էդմոն Մարուքյանը ներկայացրեց «Հայաստանի Հանրապետությունում ստեղծված իրավիճակից դուրս գալու գործողությունների ծրագիր սահմանելու մասին» նախագիծը:
ԼՀԿ-ն հրապարակել է 13 կետից բաղկացած գործողությունների ծրագիր.
1.Պարտության սիմվոլ վարչապետը հեռանում է: Խորհրդարանն ընտրում է վարչապետ: Ձեւավորվում է իրենց ոլորտներում հաջողության հասած անձանց պրոֆեսիոնալ անցումային կառավարություն.
2.Հայ-ռուսական հարաբերությունների բարձր որակի ապահովում.
Կարդացեք նաև
3.Հայաստանի, Ադրբեջանի եւ Ռուսաստանի միջեւ ստորագրված հայտարարության անորոշ դրույթների շուրջ բանակցությունների նախաձեռնում եւ վարում` հայանպաստ լուծումների հասնելու նպատակով: Արցախի ինքնորոշման իրավունքի վերջնական ամրագրման եւ կենսագործման, երկարաժամկետ կայունության եւ խաղաղության, հայկական շահը արտահայտող, հավասարակշռված համաձայնագիր ունենալու նպատակով` ԵԱՀԿ Մինսկի խմբի համանախագահների ձեւաչափով բանակցությունների ընթացքի վերականգնում.
4.Հայաստան-Արցախ-Սփյուռք ներուժի համախմբում.
5.Ներքին իրավիճակի կայունացում, բախումների դադարեցում, հանրային համերաշխության վերականգնում, պառակտող գործողությունների, բռնության կոչերի, ատելության խոսքի բացառում.
6.Պետական ինստիտուտների վերականգնում, ամրապնդում: Իրավապահ մարմինների աշխատանքի խիստ համակարգում, երկրում կարգուկանոնի ամրապնդում` հանրային անվտանգության վերականգնման ապահովման նպատակով.
7.Զոհված, անհետ կորած, գերեվարված, վիրավորված զինծառայողների եւ քաղաքացիական անձանց ու նրանց ընտանիքների կարիքների պատշաճ ապահովում.
8.Արցախահայության (այդ թվում` փախստականների) սոցիալական կարիքների անհապաղ լուծում եւ կենսագործունեության պայմանների վերականգնում Արցախում.
9.Կորոնավիրուսի դեմ պայքարի արդյունավետ համակարգում.
10.Միջազգային դոնորների համաժողովի հրավիրում` ԱՄՆ, Չինաստան, Ռուսաստան, ԵՄ 27 երկրներ, Իրան, արաբական երկրներ եւ այլն: Հայաստան-Արցախ ավիրված հատվածի վերականգնման համար առնվազն 1 մլրդ դոլար միջոցների ներգրավում.
11.Հայկական դիվանագիտության թիմի աշխատանքների հիմնարար փոփոխություն, արտաքին քաղաքականության վերաիմաստավորում, նախաձեռնողական քաղաքականության վարում դաշնակից եւ այլ պետությունների հետ: Հայաստանի խախտված իրավունքների պաշտպանության նախաձեռնում միջազգային դատական ատյաններում.
12.Տնտեսությունն ու բանակը վերականգնելու ազգային հեռանկարային ծրագրի մշակում, կայուն զարգացման ապահովում.
13.Ազատ, արդար ու թափանցիկ, հավասար պայմանների ապահովմամբ` խորհրդարանական արտահերթ ընտրությունների անցկացում:
Լսելով Մարուքյանին՝ «Իմ քայլը» խմբակցության պատգամավոր Նազելի Բաղդասարյանն ասաց. «Ճառ ասելուց պետք է անցնեք զանգ կախելու»:
Մարուքյանն արձագանքեց՝ հարցն այն է, որ ճառ ասողները իշխանություններն են. <Ի՞նչ էր գնում ձեզանից, որ օրինակ, դոնորների համաժողով հրավիրեիք, զինաթափեիք զինված խմբերին: Չեք արել, մենակ ճառ եք ասել: Եթե լուծման ընթացքը տեսնեինք, կասեինք: Օրինակ, Արցախում սոցիալական խնդիրների ուղղությամբ կոնկրետ քայլեր արվում են»:
«Իմ քայլից» Վահագ Հովակիմյանն ասաց, որ ժողովուրդն ընտրել է: Մարուքյանն էլ արձագանքեց, որ ժողովուրդն ընտրել է «Իմ քայլը» դաշինքին, բայց վարչապետին կարող են փոխել: Ըստ Վահագն Հովակիմյանի, դրա շուրջ չկա կոնսենսուս. «16 պլյուսում կա կոնսենսուս, որը ժողովրդի հետ կապ չունի»:
Իմքայլականներն ասացին, որ բացասական եզրակացություն են տալու ու դեմ են քվեարկելու, այդպես էլ արեցին: Իսկ Մարուքյանը հայտարարեց. «Դուք բոլորով դասեր չեք քաղել այս արհավիրքից, որը հղի է նոր արհավիրքով: Եթե կողմ քվեարկեք խորհրդարանում սկսենք քննարկել այս հարցերը, միգուցե լուծումներ գտնենք: Եթե չէ՝ դուք գիտեք: Սա եւս մեկ արձանագրում է, որ այն գիտակցումը չկա, թե ինչ է տեղի ունեցել: Իմ մոտ տպավորություն է, որ սա նախապատերազմյան խորհրդարանն է ու նախապատերազմյան «Իմ քայլը» դաշինքը»:
Նիստից հետո լրագրողների հետ զրույցում զանգ կախելու հետ կապված Մարուքյանն ասաց. «Իսկ ի՞նչ պետք է ես անեի: Ես հրամանատա՞րն եմ, բանակցո՞ղն եմ, վարչապե՞տն եմ,գլխավոր շտաբի պե՞տն եմ: Մարդիկ չեն կարողանում գիտակցել, որ պառլամենտ՝ նշանակում է խոսելու վայր ու մենք պետք է խոսեինք ռազմագերիներին չհանձնելու պրոցեսից ու պետք է միջազգային հանրությանը համախմբեինք Ադրբեջանին ճնշելու իմաստով: Հենց այդ խոսելու ու զանգ կախելու հարցը իշխանության վրա է մնացել, որովհետեւ իրենք հիմա ոչ խոսելու տեղ ունեն, ոչ էլ զանգ կախելու ունակություն ու կոմպետենցիա»:
Մանրամասները՝ տեսանյութում:
Հռիփսիմե ՋԵԲԵՋՅԱՆ
