«Սա քաղաքական մարմին է, հիմա դուք ուզում եք Ադրբեջանից ռազմագերիներին ստանա՞ք, թե Տարոն Սիմոնյանին բացատրում եք, թե ԱԺ-ն ինչ իրավասություն ունի: Պարզ է, որ Քարվաճառից զորքերը դուրս են եկել, ժամանակավրեպ է դարձել, բայց 8-րդ կետը չի իրացվել: Խորհրդարանին պետք է տալ հնարավորություն՝ սրա վերաբերյալ հայտարարություն անելու: Ո՞վ է ասել, որ խորհրդարանը որպես դատարան է հանդես գալու: Մենք բեռ ենք ստանձնել՝ որպես պետություն մեր բեռը կատարել ենք, մինչդեռ մյուս կողմը չի կատարել: Հիմա երկրորդ բեռն է վերցրել վարչապետը: Էլ չենք կարող խոսել Լաչինի մասին, որովհետեւ զորքերը դուրս են բերված, բայց 8-րդ կետի մասին կարող ենք խոսել: Ի լուր աշխարհի կարող ենք հայտարարել, որ Ադրբեջանը խախտում է Ժնեւյան կոնվենցիան»,- այսօր ԱԺ պետաիրավական հարցերի հանձնաժողովի նիստում իր ելույթում ասաց «Լուսավոր Հայաստան» խմբակցության ղեկավար Էդմոն Մարուքյանը:
Հիշեցնենք, որ հանձնաժողովի նիստում քննարկվում է «Լուսավոր Հայաստան» խմբակցության նախագիծը՝ «Ստեղծված իրավիճակն ու դրանից դուրս գալու ելքերը, ինչպես նաեւ Հայաստանի Հանրապետության վարչապետ Նիկոլ Փաշինյանի, Ադրբեջանի Հանրապետության նախագահ Իլհամ Ալիեւի եւ Ռուսաստանի Դաշնության նախագահ Վլադիմիր Պուտինի կողմից 2020 թվականի նոյեմբերի 09-ին ստորագրված հայտարարության իրավաչափությունը քննարկելու վերաբերյալ» հարցը:
Իմքայլականները պնդում են, որ որեւէ հարցի իրավաչափության հարց ԱԺ-ն իրավասություն չունի քննարկելու: Հանձնաժողովի նախագահ Վլադիմիր Վարդանյանը առաջարկեց աշխատանքային խումբ ստեղծել, համատեղ հայտարարություն մշակել ու ուղարկել միջազգային գործընկերներին. «Պետք է ընտրել ճիշտ ձեւաչափ: Գերեվարված անձանց ծնողներին պետք է արդյունք, այլ ոչ թե քննարկում: Հավատացեք, բոլորս սրտացավ ենք»:
Կարդացեք նաև
Հիմնական զեկուցող Տարոն Սիմոնյանը պատասխանեց, որ աշխատանքային խումբ ստեղծելը այդ նախագծին չի խանգարում. «Ռազմագերիների վերադարձի հետ կապված ինչ հարց կա՝ հաշվեք 24 ժամ ձեր տրամադրության տակ ենք ե՛ւ ես, ե՛ւ իմ գործընկերները: Բայց այս քաղաքական հայտարարության տեքստը կօգնի իրավական գործընթացներին: Եթե ուզում եք սա մերժեք, անցնի գնա՝ արեք, դրա իրավունքն ունեք, ինչ ասեմ»:
Իմքայլականները դեմ քվեարկեցին ու նախագիծը բացասական եզրակացություն ստացավ:
Հռիփսիմե ՋԵԲԵՋՅԱՆ
