Ermenihaber. Թուրքիայի ռազմարդյունաբերության վարչության պետ Իսմայիլ Դեմիրը մամուլի ասուլիսի ժամանակ գնահատել է 2020թ․ ռազմարդյունաբերական առաջընթացն ու անդրադարձել առաջիկա 10 տարվա ընթացքում ռազմարդյունաբերության ոլորտում Թուրքիայի ծրագրերին։
Նրա խոսքով՝ հատկապես 2016թ․ հուլիսի 15-ի հեղաշրջման փորձից հետո թուրքական զինված ուժերը սկսել են ավելի շատ օգտագործել տեղական արտադրության զենքն ու զինամթերքը։ Ընդ որում՝ նպատակն այն է, որ տեղական արտադրության զենքերը որակապես չզիջեն արտասահմանյանին, որպեսզի նախապատվությունը տրվի թուրքական արտադրանքին։
Խոսելով նաև թուրքական արտադրության «Siper» հակաօդային պաշտպանության համակարգի մասին՝ Դեմիրը նշել է, որ այդ համակարգը շարունակաբար կատարելագործվում է։ Մինչև 2025-2026թթ․ ծրագրվում է այդ համակարգը հասցնել ռուսական S-400 ՀՕՊ համակարգերի մակարդակին՝ օգտվելով նաև ռուսական զենքի հետ աշխատանքից ստացվող գիտելիքներից։
Թուրքիայի ռազմարդյունաբերական վարչության պետը կարևորել է նաև անօդաչու թռչող սարքերի, ինչպես նաև՝ ռազմածովային, ռազմաօդային և ցամաքային ռազմական տեխնիկայում առանց օպերատորի գործող սարքերի ինտեգրման կարևորությունը։
