«ԲԴԽ անդամը պետք է քաղաքական զսպվածություն ցուցաբերի: Ես որեւէ քաղաքական գնահատական չեմ տալու»,-խորհրդարանում լրագրողների հետ զրույցում այսօր անդրադառնալով հարցին, թե որպես իրավաբան՝ ի՞նչ գնահատական կտա Արցախի հարցով եռակողմ հայտարարությանը, արդյոք դավաճանական գործողություն չի տեսնո՞ւմ իշխանության քայլերում, ասաց ԲԴԽ անդամի թեկնածու Գագիկ Ջհանգիրյանը:
Հիշեցնենք, որ խորհրդարանում այսօր «Իմ քայլը» խմբակցության անդամները հանդիպում էին ՀՀ բարձրագույն դատական խորհրդի անդամի պաշտոնում առաջադրված թեկնածու՝ ՀՀ նախկին զինվորական դատախազ, ՀԱԿ խմբակցության նախկին պատգամավոր Գագիկ Ջհանգիրյանի հետ:
Նկատառմանն ի պատասխան, որ դավաճանական գործողությունների մասին հայտարարություններ եղան, ԳՇ նախկին պետ Մովսես Հակոբյանը բացահայտումներ արեց, Գագիկ Ջհանգիրյանն ասաց. «Նախկին բարձրաստիճան զինվորականը երբեք նման հայտարարություններ անելու իրավունք չպետք է իրեն վերապահի»:
Ինչ վերաբերում է մամուլում առկա տեղեկություններին, թե Ջհանգիրյանը բարձրագույն դատական խորհուրդ է գնում՝ «բռի մեջ հավաքելու դատավորներին», վերջինս պարզաբանեց. «Ես ԲԴԽ-ում մեկ ձայնի իրավունք եմ ունենալու: Նման բան ոչ հայտարարել եմ, ոչ ասել եմ»:
Կարդացեք նաև
Իսկ թե ինչ խնդիրներ է տեսնում դատական համակարգում, Գագիկ Ջհանգիրյանը պատասխանեց. «Ազնվորեն ասեմ: Չեմ հասկանում, երբ, օրինակ, ռազմական հեղաշրջման կոչի մեղադրանքով անձին տանում են որպես խափանման միջոց կալանք կիրառելու, եւ դատարանը նրան բաց է թողնում: Անձեր չեմ ասում: Կամ, հսկայական զինվորական արսենալ են հայտնաբերում մեկի մոտ, ուզում են կալանավորել, իսկ դատարանը մերժում է»:
Ջհանգիրյանը նաեւ նշեց, որ դատական իշխանության անխափան գործունեությունն ապահովելու համար գործադիրը շատ կարեւոր լծակներ ունի՝ սկսած վարձատրությունից, շենքային պայմաններից, դատավորների աշխատավարձից:
Լուիզա ՍՈՒՔԻԱՍՅԱՆ
