ԱՄՆ Կոնգրեսի Ներկայացուցիչների պալատն ընդունել է բանաձև, որում առաջարկում է փոխնախագահ Մայք Փենսին հեռացնել իշխանությունից գործող նախագահ Դոնալդ Թրամփին:
Բանաձևին կողմ է քվեարկել 223, դեմ՝ 205 պատգամավոր: Կողմ քվեարկողների մեջ եղել է միայն մեկ հանրապետական: Դեմ քվեարկողների մեջ էլ ոչ մի դեմոկրատ չի եղել:
Բանաձևը կոչ է անում փոխնախագահին կիրառել Սահմանադրության 25-րդ ուղղումը, ըստ որի պետության ղեկավարն ի զորու չէ կատարել իր պարտականությունները: Այդ դեպքում Փենսը աշխատակազմի անդամների մեծամասնության աջակցությամբ կարող է Թրամփին հեռացնել իշխանությունից և զբաղեցնել նրա տեղը, մինչև որ Կոնգրեսը հաստատի այդ որոշումը:
Հակառակ դեպքում դեմոկրատները սպառնում են իմփիչմենթ հայտարարել նախագահին Ներկայացուցիչների պալատում՝ նրան մեղադրելով խռովություն սադրելու մեջ: Ընդ որում, նրան հեռացնելու համար կպահանջվի սենատորների ձայների երկու երրորդը, իսկ դա դեռ չի հավաքվում: Բացի այդ, Կոնգրեսի վերին պալատը, հնարավոր է, չհասցնի քննարկել Թրամփին հեռացնելու մեղադրանքների հարցը մինչև հունվարի 20-ը՝ ընտրված նախագահ Ջո Բայդենի երդմնակալությունը:
Կարդացեք նաև
Ինքը՝ Փենսը, երեքշաբթի գրավոր ձևով տեղեկացրել էր Ներկայացուցիչների պալատի խոսնակ Նենսի Փելոսիին, որ դեմ է Թրամփի հեռացմանը: Նա նշել էր, որ 25-րդ ուղղումը «պատժի և իշխանության բռնազավթման միջոց չէ», և որ «դրա կիրառումը սարսափելի նախադեպ կստեղծի»:
Պատրաստեց՝ Վիկտորյա ԱՆԴՐԵԱՍՅԱՆԸ
