«Caucasus Edition»-ը վեբինար էր կազմակերպել «Լեռնային Ղարաբաղի հակամարտության խաղաղ կարգավորման ձախողումները և հեռանկարները թեմայով»։
Քննարկմանը մասնակցում էին ՀՀ առաջին նախագահի արտաքին քաղաքական հարցերով խորհրդական Ժիրայր Լիպարիտյանը և վերլուծաբան Զաուր Շիրիևը։
«Շատ պատճառներ կան բանակցությունների ձախողման համար։ Սա պարզապես շահերի հակամարտություն չէր, սա մի հակամարտություն էր, որի մեջ կողմերը ներդրել են իրենց պատմությունը, իրենց մշակույթը: Հակամարտություն էր, որը մաս էր կազմում երկու կողմերի ներքին զարգացումների վրա»,- ասաց Ժիրայր Լիպարիտյանը։
Նա կարծում է, որ ԵԱՀԿ Մինսկի խումբը անարդյունավետ էր․ «Այնպես չէր, որ նրանք ռեսուրսներ չունեն։ Շատ կարևոր երկրներ են՝ Ռուսաստանը, ԱՄՆ-ն, Ֆրանսիան։ Սրանք պետություններ են, որոնք մեծ ռեսուրսներ ունեն՝ ռազմական, դիվանագիտական, տնտեսական, և նրանք ՄԱԿ-ի անվտանգության խորհրդի անդամներ են։ Խնդիրն այն էր, որ չնայած այն հանգամանքին, որ բոլոր երեքն էլ համաձայնության էին եկել լուծման հիմունքների վերաբերյալ, բոլոր երեքն էլ ասացին, որ Ղարաբաղը չի կարող անկախ լինել, բոլոր երեքն էլ ասացին, որ գրավված տարածքները պետք է վերադարձվեն։ Չնայած դրան, նրանք Ղարաբաղի կոնֆլիկտը չէին դիտարկում իբրև առանձին կոնֆլիկտ, նրանք դա դիտարկում էին իբրև տարածաշրջանային խնդրի մաս»։
Կարդացեք նաև
Ժիրայր Լիպարիտյանը համարում է, որ Ֆրանսիան դուրս է եկել գործընթացից, իսկ ԱՄՆ-ն ընդհանրապես հրաժարվել է աշխարհից․ «Ռուսաստանը ճիշտ պահն է գտել։ Չեմ տեսնում, որ մնացած երկուսը վերադառնան, չնայած Ռուսաստանը կցանկանա, որ պաշտոնապես ԵԱՀԿ-ի շրջանակներում, և ինչ որոշում էլ կայացվի, ստանալ ԵԱՀԿ-ի հաստատումը»։
Ամի ՉԻՉԱԿՅԱՆ