«Այսօր հավաքվել ենք, որպեսզի մեր ձայնը բարձրացնենք եւ կոնկրետ խնդիրներ վերհանենք ու անպայման գործնական քայլերի գնանք…Այսօրվա հիմնական թեման դավաճանությունն է, դավաճանությունը մեր երկրի, մշակույթի, կրթության, գիտության նկատմամբ, մեր երկրի բոլոր ոլորտների նկատմամբ: Մենք այսօր գտնվում ենք օրհասական վիճակում»,- հունվարի 12-ին «Մեցցո» ակումբում կայացած մշակույթի գործիչների «Ձայն հայրենյաց» նախաձեռնության երկրորդ հավաքում հայտնեց Սամվել Հարոյանը:
Գնդապետ, գրող, հրապարակախոս Աշոտ Մինասյանը նշեց. «Կապ չունի, ես գնդապետ եմ, թե ոչ, ես ձեր զինվորն եմ, պատրաստ եմ կատարել բոլոր այն հրամանները, որոնք անհրաժեշտ են իմ հայրենիքի համար: Պետությունը մի մարմին է, մի անհատ է, մի անձ է, որը մեզանից յուրաքանչյուրը պարտավոր է պահպանել, բայց ցավոք դա չարեցինք»:
Նա ասաց, որ առաջին անգամ է նման մեծ թվով մտավորականների հանդիպում, ապա հավելեց. «Ես միշտ մտածել եմ, որ մտավորականները գրողներն են, բանաստեղծներն են, երգիչներն են, նկարիչները, քանդակագործները…Ես հասկացա, որ մտավորականը նա է, ով իր հայրենիքի զինվորն է, իսկ ես հայրենիքի զինվոր եմ…Ցավոք, բոլորս, ես էլ ձեզ հետ, չկարողացանք պայքարել ստի դեմ, որին առնչվեցինք…Ցավում եմ, բայց նաեւ կոչ եմ անում, որ իմ մտավորականը, իմ հոգեւորականը, իմ զինվորը եւ իմ մշակույթի բոլոր գործիչները մեկտեղվեն, դառնան մեկ մարդ, մեկ մարմին եւ պետություն»:
Կինոդրամատուրգ Լեւոն Գալստյանն էլ նշեց. «Ես այսօր խոսելու եմ հենարանների մասին… առանց հենարանների ոչ մի մարմին չկա, քանդեցիք հենարանը` կփլվի շենքը: Մեր հենարաններն այսօր խարխուլ են, մեր հենարանները, հոգեւոր հիմքերը, բարոյական արժեքները, որոնց վրա դարեր շարունակ խարսխված է եղել մեր պատմությունը, այսօր գտնվում է մոլորյալ, թափառ վիճակում: Մենք այսօր պարտավոր ենք ձեւակերպել այն տեսլականը, այն գերակա գաղափարը, որը կարող է պատվար լինել, ամրացնել այն գլխավոր հենասյունը, որը մեզ կտա բացարձակ հարատեւման երաշխիք: Շատերի կարծիքով, դա անվտանգությունն է:
Կարդացեք նաև
Պատերազմը ծանր ապտակ հասցրեց մեզ: Մենք առարկայական, թանձրացական ձեւով շոշափեցինք վտանգի մարմինը…Մենք պետք է ձեւակերպենք, թե այդ ինչ անվտանգության մասին է խոսքը, արդյոք միայն անվտանգության հայցեցակարգի՞, որտեղ հերթապահ նախադասություններ են նշված: Ոչ, սա պետք է լինի իսկապես բոլորիս համախմբող մի կարեւորագույն նպատակ, արժեք, որի շուրջ լինելու են նույնքան կարեւորագույն գաղափարներ` ազատությունն ու արդարությունը»,-ասաց կինոդրամատուրգ Լեւոն Գալստյանը:
Նրա ձեւակերպմամբ, անվտանգության մեջ էլ որոշակի վտանգ կա, եթե այն բացասականացնում ես եւ ամբողջ երկիրը, հանրային, պետական համակարգերը կառուցում ես միայն այդ տրամաբանությամբ:
Գոհար ՀԱԿՈԲՅԱՆ