Հայ-Ռուսական համալսարանի Ինժեներա-ֆիզիկական ինստիտուտի Ընդհանուր ֆիզիկայի և քվանտային նանոկառուցվածքների ամբիոնի վարիչ, ֆիզիկամաթեմատիկական գիտությունների թեկնածու, դոցենտ Դավիթ Հայրապետյանը արժանացել է 2021 ICO-ICTP Գալիենո Դենարդո միջազգային մրցանակին՝ օպտիկայի և ֆոտոնիկայի ոլորտում նշանակալի ներդրումների համար:
Նա առաջին երիտասարդ հետազոտողն է Հայաստանի Հանրապետությունից, որը ստացել է ICO-ICTP Գալիենո Դենարդոյի մրցանակը։
Վերոնշյալ մրցանակը 2000թ․-ին հիմնել են Օպտիկայի միջազգային կոմիտեն (ICO) և Աբդուս Սալամի տեսական ֆիզիկայի միջազգային կենտրոնը (ICTP)։ Այն տրվում է զարգացող երկրների՝ մինչև 40 տարեկան երիտասարդ հետազոտողներին, որոնք ակտիվորեն զբաղվում են օպտիկայով և ֆոտոնիկայով՝ նպաստելով իրենց կամ այլ զարգացող երկրներում հետազոտական գործունեության խթանմանը:
Հիշեցնենք նաև, որ անցած տարի Դավիթ Հայրապետյանի գլխավորած գիտական հզոր թիմի (ՀՌՀ-ի Ինժեներա-ֆիզիկական ինստիտուտի տնօրեն Հայկ Սարգսյան, ՀՌՀ-ի գլխավոր գիտական խորհրդատու Էդուարդ Ղազարյան և Պայծառ Մանթաշյան) «Twinning to strengthen Russian-Armenian University’s research and innovative capacity in Nanomaterials for Quantum Information and Quantum Optics» նախագիծը ճանաչվել էր Հորիզոն 2020 Թվինինգ ծրագրի հաղթող: Այդ նախագիծը հիմք կհանդիսանա Հայաստանում նանոնյութերի հետազոտությանը՝ քվանտային ինֆորմատիկայում և քվանտային օպտիկայում կիրառելու նպատակով:
Կարդացեք նաև
Հայ-ռուսական համալսարան
