Հայաստանն այսօր բանակցություններ է վարում կորոնավիրուսի դեմ պատվաստանյութերի ձեռքբերման համար: Այս մասին այսօր տեղեկացրեց ՀՀ առողջապահության նախարարության Հիվանդությունների վերահսկման եւ կանխարգելման ազգային կենտրոնի գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը: Նրա խոսքով, Հայաստանի բնակչության 10 տոկոսին նախատեսվում է կորոնավիրուսի դեմ պատվաստել: Պատվաստանյութը, նախեւառաջ, հասանելի կլինի ռիսկի խմբի քաղաքացիների համար: Նախարարության ներկայացուցիչն ասաց, որ կա գործող պայմանագիր COVAX Facility նախաձեռնության հետ, որի շրջանակում մոտ ապագայում նախատեսվում է պատվաստանյութը ներկրել ռիսկի խմբերի համար: Հիմա քննարկվում է ներկրման ժամանակացույցը:
Բանակցություններն այս պահին վարվում են ռուսական «Sputnik-V», Pfizer /BioNTech, Moderna եւ Astrazeneca-ի պատվաստանյութերի շուրջ, քանի որ միայն այս չորսի արդյունավետությունն ու անվտանգությունն են ապացուցվել հետազոտությունների շրջանակում:
Նախարարության պատասխանատուները հույս ունեն, որ որոշ քանակությամբ պատվաստանյութ Հայաստանում կհայտնվի մինչեւ հունվարի վերջ կամ փետրվարի սկիզբ:
Գայանե Սահակյանն ասաց, որ առողջապահության նախարարից բացի՝ այլ անձինք էլ են պատվաստվել, այդ թվում եւ ինքը. «Մենք ստացել ենք օգնություն 15 հոգու համար: Որեւէ մեկի մոտ հետպատվաստումային անբարեհաջող դեպք չի գրանցվել: Նույնիսկ հաճախ խոսվող ռեակցիան, այն է՝ ներարկվող հատվածում կարող է առաջանալ կարմրություն, տեղային ցավ, չի նկատվել»:
Նրա խոսքով՝ իրենց ձեռքի տակ է «Սպուտնիկ V»-ի կլինիկական փորձարկումների գործը, ըստ որի, առաջին դեղաչափից հետո արդյունավետությունը գնահատվել է 91.4 տոկոս, երկրորդ դեղաչափից հետո այն հասնում է 94 տոկոսի: Հանրապետության գլխավոր իմունոլոգն ասաց, որ պատվաստանյութը գուցե ոչ միշտ է կանխում վարակումը, սակայն այն կանխում է ծանր դեպքերն ու կորոնավիրուսից մահը. «Եթե պատվաստված մարդը վարակվի կորոնավիրուսով, ապա հավանաբար, հիվանդությունը թեթեւ կամ առանց ախտանիշների կտանի»:
Կարդացեք նաև
Գայանե Սահակյանը նաեւ նշեց, որ այդ պատվաստանյութով պատվաստված մարդկանց համար հակամարմինների մակարդակի անալիզներ Հայաստանում չեն անցկացվել, քանի որ դրա համար անհրաժեշտ են ոչ թե ընդհանուր հակամարմինների, այլ՝ չեզոքացնող հակամարմինների թեստեր:
Լուսինե ԲՈՒԴԱՂՅԱՆ
