Ամանորյա տոներից հետո կանխատեսվում է, որ առաջիկայում կորոնավիրուսի որոշակի աշխուժացում կլինի: Այս մասին այսօր «Արմենպրեսի» մամուլի սրահում ասաց ՀՀ առողջապահության նախարարության Հիվանդությունների վերահսկման եւ կանխարգելման ազգային կենտրոնի գլխավոր տնօրենի տեղակալ, իմունականխարգելման ազգային ծրագրի ղեկավար Գայանե Սահակյանը: Նրա խոսքով, պատճառն այն է, որ տոներին մարդիկ ավելի շատ են շփվել միմյանց հետ, իրար տուն են գնացել եւ այդպիսով տարածել վարակը:
Ըստ նրա, նախատոնական օրերին Հայաստանում կորոնավիրուսային վարակի հետ կապված համաճարակային իրավիճակի կայունացում էր նկատվում. «Վերջին 14 օրերին վարակի վերարտադրման ցուցանիշը, 0.84 էր, մինչդեռ նախորդող 14 օրերին՝ 1.43»:
Տիկին Սահակյանի տվյալներով, մեր երկրում կորոնավիրուսային վարակի 162 հազար 643 դեպք է գրանցվել, 8300 քաղաքացի բուժում է ստանում, մահաբերությունը կազմել է 1.8 տոկոս:
Կարդացեք նաև
Լուսինե ԲՈՒԴԱՂՅԱՆ
