«Ոչ, նախարարությունը ֆինանսական ճգնաժամ չի ունեցել: Դուք ֆինանսական խնդիրները մեկնաբանում եւ ներկայացնում եք որպես կենսաթոշակների եւ աշխատավարձերի վճարո՞ւմ: Այդպես չէ»,-խորհրդարանում լրագրողների հետ զրույցում այսօր անդրադառնալով տեղեկություններին, թե պատերազմի հետեւանքով կենսաթոշակների եւ նպաստների բաշխման ճգնաժամ է առաջացել, եւ «Հայաստան համահայկական հիմնադրամին» ուղղված նվիրատվություններն իրացվել են այդ խնդրի համար՝ ասաց ֆինանսների փոխնախարար Արման Պողոսյանը:
«Ֆինանսների նախարարությունը հայտնել է, որ միասնական բյուջետային գործընթացի առաջնային գերակայությունների շրջանակում միջոցների տնօրինում է իրականացվել, դուք հարցն այլ կերպ եք ներկայացնում»,-նշեց նա:
Պատասխանելով հարցին, թե արդյոք պետությունը պատերազմի եւ կորոնավիրուսի հետեւանքով չունի՞ հարկահավաքության, ֆինանսական խնդիրներ, Արման Պողոսյանը նշեց. «Ի ուրախություն բոլորիս՝ մենք տարին ավարտել ենք բավականին բարձր եւ տպավորիչ հարկային կարգապահությամբ, եւ ստեղծված տնտեսական իրավիճակին համապատասխան՝ հավաքագրումների բավականին լավ մակարդակ ունենք: Դա մի կողմից հարկային կարգապահության, իսկ մյուս կողմից՝ հարկային վարչարարության եւ ստեղծված իրավիճակը սթափ գնահատելու, վարքագիծ ձեւավորելու արդյունք է: Ձեր նշած խնդիրը ՀՀ-ում չկա: Բյուջետային գործընթացը սպասարկվում է նորմալ: Հարկատուների կողմից սահմանված հարկային պարտավորությունից ավելի գումար հնարավոր չէ վճարել բյուջե»:
Լուիզա ՍՈՒՔԻԱՍՅԱՆ
