«Aliq Media»-ի գլխավոր խմբագիր, վարչապետի՝ արտաքին քաղաքական հարցերով նախկին խորհրդական Արսեն Խառատյանի ֆեյսբուքյան գրառումը
Բանաձեւը պարզ է. Չկա գերիների վերադարձ, չկա ենթակառուցվածքների ապաշրջափակում
Հունվարի 11-ի` Փաշինյան-Ալիեւ-Պուտին եռակողմ հայտարարությունից ակնհայտ դարձավ, որ նոյեմբերի 9-ով նախատեսված գերիների վերադարձի հարցը չի լուծվում:
Սա կարող է երկու բան նշանակել. կամ Պուտինը չի ցանկանում լուծել խնդիրը, կամ անկարող է դա անել: Հիմա, որքան էլ գործող քաղաքական մեծամասնության գործընկերները պնդեն, թե ռուսներն այս հարցում մեզ հետ են, փաստերը հուշում են, որ սա ոչ այլ ինչ է քան ցանկալին իրականության տեղ ներկայացնել:
Կարդացեք նաև
Այսպիսով` Հայաստանն ունի երկու անելիք.
1.Գերիների վերադարձը ձեւակերպել որպես նախապայման մինչեւ նոր հայտարարությամբ նախանշված գործողությունների ուղղությամբ որեւէ քայլ անելը` հղվելով նոյեմբերի 9-ի հայտարարությունն ամբողջությամբ իրականացնելու անհրաժեշտության վրա:
2.Հաշվի առնելով հարցը կարգավորելու Մոսկվայի անկարողությունը, մեր ձեռքերն ամբողջությամբ ազատ են ԵԱՀԿ Մինսկի խումբը համանախագահող մյուս 2 մայրաքաղաքների եւ ուժային այլ կենտրոնների հետ գերիների վերադարձն ապահովելու ուղղությամբ աշխատանքներ տանելու տեսանկյունից:
Այսպիսով` արձանագրում ենք, որ հունվարի 11-ին ստորագրված նոր հայտարարությունն անհնար է իրագործել, քանի դեռ ավարտին չի հասցվել նոյեմբերի 9-ով նախատեսվածի անելիքները: Մասնավորապես, անհնար է ճանապարհային հաղորդակցություն ունենալ մի երկրի տարածքով, որտեղ մեր քաղաքացիները պահվում են որպես պատանդ:
