Այս հունվարին Շտապօգնության ծառայության կանչերի առաջին տեղում եղել են սրտանոթային հիվանդությունները, այնուհետեւ՝ սուր շնչառական հիվանդությունները եւ վնասվածքները: Այսօր այս մասին «Պոստ Սկրիպտում» մամուլի ակումբում ասաց «Շտապօգնություն» ՓԲԸ տնօրեն Թագուհի Ստեփանյանը: Նրա խոսքով, սակայն այս ամանորը, նախորդի համեմատությամբ, շատ ավելի հանգիստ է անցել. «Մենք սպասարկել ենք 1377 կանչով ավելի քիչ, քան անցյալ տարի: Ամբողջ կանչերի թիվը կազմել է 6 հազար 533, հիվանդանոց է տեղափոխվել 1204 հիվանդ՝ 453-ով ավելի քիչ, քան անցյալ տարի: Նվազել են ե՛ւ մանկական կանչերը, ե՛ւ հիվանդանոց տեղափոխված երեխաների քանակը։ Պետք է ասեմ, որ չենք ունեցել ընդհանրապես սննդային թունավորումներ»: Ըստ նրա, ալկոհոլային թունավորում է գրանցվել 27 քաղաքացու մոտ, որից 20-ը տեղափոխվել են հիվանդանոց։
Սուր շնչառական հիվանդություններով մարդկանց թիվը 13 հազար 735 է:
Ամփոփելով նաեւ անցած տարին, Թագուհի Ստեփանյանն ասաց, որ մինչ այս տարվա հունվարի 7-ը կորոնավիրուսով պայմանավորված կանչերն առավելագույնը սպասարկել են մայիսին՝ եղել է 2580 կանչ, իսկ նվազագույնը՝ օգոստոսին՝ 864 կանչ: Ընդհանուր առմամբ սպասարկել են 15 հազար 420 կանչ:
Թեեւ շատ են խոսել այդ մասին, բայց կանչերն ընդհանրապես չեն մերժվել, ուղղակի որոնք անհետաձգելի չեն եղել, ավելի ուշ են սպասարկվել»,-ասաց «Շտապօգնության» տնօրենը:
Կարդացեք նաև
Լուսինե ԲՈՒԴԱՂՅԱՆ
