ԽՍՀՄ առաջին և վերջին նախագահ Միխայիլ Գորբաչովը հարցազրույց է տվել «ՌԻԱ Նովոստի» գործակալությանը, որում խոսել է հետխորհրդային տարածությունում տիրող իրավիճակի, այդ թվում՝ Արցախի հակամարտության մասին:
Մասնավորապես, նա հույս է հայտնել, որ Ռուսաստանը կկարողանա օգնել Լեռնային Ղարաբաղի խնդրի կարգավորման գործում: Այնուամենայնիվ, ըստ նրա, այդ հարցում առաջատար դերը Հայաստանինն ու Ադրբեջանինն է, լուծումը պետք է բխի երկու երկրների շահերից, «առանց հաղթողների և պարտվողների»:
«Ինչ վերաբերում է Ղարաբաղին… Շատ բարդ, հնացած հարց է, որի արմատները գտնվում են անցյալում: Երբ այն սրվեց, մենք փորձեցինք օգնել երկու հանրապետություններին, երկու ժողովուրդներին գտնել լուծում: Հետագայում էլ Ռուսաստանը փորձեց»,- ասել է նա:
Գորբաչովը վստահություն է հայտնել, որ հիմա, երբ ռազմական գործողությունները դադարեցված են, կարևոր է կանգ չառնել դրա վրա, չթողնել, որպեսզի խնդիրը ևս մեկ տասնամյակ մնա չլուծված:
Կարդացեք նաև
«Հույս ունեմ՝ Ռուսաստանը կկարողանա օգնել, բայց գլխավոր դերը հակամարտության կողմերինն է: Հայաստանն ու Ադրբեջանը պարտավորություններ են ստանձնել անցկացնելու կարգավորման շուրջ բանակցություններ: Լուծումը պետք է բխի երկու երկրների շահերից, առանց հաղթողների և պարտվողների»,- ասել է Գորբաչովը:
Պատրաստեց՝ Վիկտորյա ԱՆԴՐԵԱՍՅԱՆԸ
