Ադրբեջանցիները սկսել են նորոգել իրենց հսկողության ներքո անցած Սյունիքի մարզի Շուռնուխի մի հատվածում գտնվող շուռնուխցիների տները։ Դրան զուգահեռ՝ նրանք վրաններ են խփել, բարձրացրել իրենց պետական դրոշը։ Գարեն եւ Անուշ Դալլաքյանները, ի տարբերություն ուրիշների, չեն քանդել իրենց տունը՝ մտածելով, որ գուցե մի օր հետ կվերադառնան (նրանց մասին հոդվածը առաջիկայում–Ա․ Դ․):
Ի դեպ շուռնուխցիները պատմեցին, որ իրենց գյուղացի Ստյոպայի տան կեսն ընկնում է ադրբեջանական տարածքի, կեսը՝ հայկական տարածքում։ «Իրան ասում են ապրի էդ տանը, բա ո՞նց ապրի»,–հարցնում են նրանք։
Նշեմ, որ Ստյոպա Մովսիսյանի խնդրին անդրադարձել էր Մարդու իրավունքների պաշտպան Արման Թաթոյանը՝ օրերս լինելով Շուռնուխում։
Գյուղացիների պատմելով, երբ ադրբեջանցի գեներալը հասնելով գյուղ, տեսավ, որ տները չեն ազատել՝ զարմացավ։ «Ասաց, ես 10 օր առաջ եմ տեղեկացրել, որ պիտի ազատեք, խի ձեր ղեկավարությունը ձեզ չի ասել»,–ասել էր նա՝ եւս 3 օր ժամանակ տալով։ «Ասաց, ես բարի եմ, ժամանակին ձերոնք ինձ մի ժամ տվին , որ Կուբաթլուից փախնեմ»,–պատմում է Գարեն Դալլաքյանը։ Վերջինիս, ինչպես նաեւ բոլոր շուռնուխցիներին մի հարց է հետաքրքրում է՝ ո՞վ է այն պաշտոնյան, որ տեղյակ է եղել ու նրանց չի զգուշացրել։
Կարդացեք նաև
Ի դեպ, Շուռնուխի վարչական շրջանի ղեկավար Հակոբ Արշակյանը Aravot.am-ի հետ զրույցում նշել էր, որ հակառակորդը չի կարող անցնել հայկական տարածք, նրանց շարժը վերահսկվում է ռուս խաղաղապահների կողմից։ «Հետո էլ նրանք նույնիսկ անզեն տեսնելուց վախենում են, ո՞ւր գան»,–ասել էր գյուղապետը։
Արմեն ԴԱՎԹՅԱՆ
