«Մենք պատրաստ էինք 2021 թվականի ծանր մեկնարկին, և հենց այդպես էլ եղավ»,- լրագրողների հետ առցանց հանդիպման ընթացքում ասաց Առողջապահության համաշխարհային կազմակերպության (ԱՀԿ) Եվրոպայի տարածաշրջանային գրասենյակի ղեկավար Հանս Կլյուգեն։
Նա նշեց, որ ԱՀԿ-ի՝ COVID-19-ի մասին առաջին հրապարակումից մեկ տարի անց առկա են նոր գործիքներ և նոր գիտելիքներ վիրուսի մասին․ «ԱՀԿ Եվրոպայի տարածաշրջանը 2020-ին տեսել է ավելի քան 26 միլիոն COVID-19-ի հաստատված դեպք և COVID-19-ով պայմանավորված ավելի քան 580 հազար մահ»։
Հանս Կլյուգեի խոսքով՝ 2021-ն իր հետ բերում է նաև նոր մարտահրավերներ․ «Բոլոր վիրուսների նման, ինչպես արդեն շրջանառվել էր, COVID-19-ը ժամանակի ընթացքում փոփոխությունների է ենթարկվել։ Ես հասկանում եմ մտահոգությունը SARS CoV-2 VOC-ի հնարավոր ազդեցության վերաբերյալ։ ԱՀԿ 22 երկիր հայտնաբերել է այս տարբերակը։ Այս տարբերակը «մտահոգիչ» է, քանի որ այն բարձր փոխանցելիություն ունի։ Մենք հասկանում ենք, որ հիվանդության այս տարբերակը էական փոփոխություն չունի, այսինքն՝ COVID-19-ը ո՛չ ավելի, ո՛չ պակաս ծանր չէ։ Այն տարածվում է բոլոր տարիքային խմբերում, և երեխաների շրջանում, թվում է, թե ռիսկը մեծ չէ»։
Նա շեշտեց, որ այս տարբերակը, այնուամենայնիվ, տագնապ է առաջացնում, քանի որ առանց դրա տարածումը դանդաղեցնելու ուղղությամբ ձեռնարկվող քայլերի, այն ավելի մեծ ազդեցություն կունենա արդեն ճնշված և սթրեսի ենթարկված առողջապահական հաստատությունների վրա։ Հանս Կլյուգեն հորդորեց երկրներին ձեռնարկել բոլոր անհրաժեշտ քայլերը՝ նվազեցնելու համար այդ բեռը։
Կարդացեք նաև
Անդրադառնալով պատվաստանյութերին՝ Հանս Կլյուգեն ասաց, որ ԱՀԿ-ն և իր գործընկերները ջանքեր են գործադրում, որ յուրաքանչյուր երկիր ստանա պատվաստանյութ, սակայն հարկավոր է, որ յուրաքանչյուր երկիր, որը դրա հնարավորությունը ունի, աջակցի պատվաստանյութերի արդադարացի հասանելիությանը և տեղակայմանը․ «Լինի դա պատվաստանյութերի հատկացումը, բժշկական պարագաների և թեստերի հասանելիությունը, համաճարակը վերահսկելու հանրային առողջապահական միջոցառումները, մենք պարտավոր ենք մեր որոշումների հիմքում դնել մարդկության հիմնական արժեքները` համերաշխություն, անաչառություն և սոցիալական արդարադատություն։ Սա այս անորոշ ժամանակներից միակ ելքն է, քանի որ ոչ ոք ապահով չէ, քանի դեռ բոլորն ապահով չեն»։
Ամի ՉԻՉԱԿՅԱՆ
