Ադրբեջանի նախագահ Իլհամ Ալիևը 2020թ. ամփոփիչ խորհրդակցության ժամանակ սպառնացել է, որ եթե հայ պաշտոնյաները շարունակեն այցելել Լեռնային Ղարաբաղ, իրենց պատասխանը «շատ կոշտ» կլինի:
«Ինձ նոր հայտնեցին, որ Հայաստանի արտգործնախարարը մեկնել է Խանքենդի (Ստեփանակերտ-խմբ.): Ի՞նչ գործ կարող ես ունենալ այնտեղ: Թող նրանք չմոռանան պատերազմի «Երկաթե բռունցքի» մասին: Այդ այցերը պետք է դադարեցվեն: Մենք զգուշացնում ենք, որ եթե նման սադրիչ քայլեր ձեռնարկվեն, Հայաստանն էլ ավելի կափսոսա դրա համար»:
Ալիևը հիշեցրել է, որ այժմ քայլեր են ձեռնարկվում հարաբերությունների կարգավորման համար: Ռուսաստանը կողմերին է տրամադրել իր միջնորդական հնարավորությունները: Ռուսաստանի կառավարության ներկայացուցիչների պատվիրակությունը վերջերս այցելել են Հայաստան և Ադրբեջան, հիմնականում զրույցները տարվել են այդ թեմաներով:
«Իսկ եթե հարաբերությունները կարգավորվում են, ապա ինչո՞ւ են իրականացվում այդպիսի սադրիչ «այցեր»: Ի՞նչ են նրանք ուզում ցույց տալ: Նորի՞ց են ուզում մեզ բարկացնել: Թող չմոռանան, որ նման քայլերը նրանց վրա շատ ծանր են նստել: Բոլոր այցերը պետք է դադարեցվեն»,- ասել է Ադրբեջանի նախագահը:
Կարդացեք նաև
Ալիևի խոսքով՝ եթե «նման քայլերը շարունակվեն, մեր պատասխանը կլինի շատ կոշտ»: «Առաջին անգամ մենք նրանց զգուշացրինք արտգործնախարարության միջոցով: Դրանից հետո զգուշացումն այլ կլինի: Նրանց ոտքն այնտեղ չպետք է լինի: Թող նստեն իրենց երկրում»,- սպառնացել է Ալիևը:
Ալիևը նաև նշել է, որ մի օտարերկրյա քաղաքացի չի կարող մուտք գործել այդ տարածք՝ առանց իրենց թույլտվության: «Ոչ մի միջազգային կազմակերպություն, բացառությամբ Կարմիր Խաչի, չի կարող այնտեղ գտնվել: Դա մեր տարածքն է: Ամբողջ աշխարհը այդ տարածքը ճանաչում է Ադրբեջանի անբաժան մաս»,- ասել է Ալիևը:
Հայաստանի ԱԳՆ խոսնակի արձագանքն այս հայտարարությանը՝ կարդացեք այստեղ:
Պատրաստեց՝ Վիկտորյա ԱՆԴՐԵԱՍՅԱՆԸ
