Կապիտան Հովհաննես Խաչիյանն իր մահվանից երեք ժամ առաջ է զրուցել մեծ եղբոր՝ Նարեկ Խաչիյանի հետ:
Aravot.am-ի հետ զրույցում Նարեկ Խաչիյանը պատմեց. «Զոհվելու օրը մի երեք ժամ առաջ զանգեցի եղբորս: Ասաց մեզ համար չգիտեմ, բայց ձեզ համար լավ է լինելու, հանգիստ եղեք: Երեկոյան ժամը հինգի կողմերը դեպքը եղավ»:
Հովհաննես Խաչիյանը հատուկ նշանակության սպայական ջոկատի անձնակազմից էր, կոչումով կապիտան: Նարեկ Խաչիյանը պատմեց. «Եղբայրս կռվել է Թալիշում, Մատաղիսում, Ջեբրայիլում, Կուբաթլուում, Ֆիզուլիում, Կարմիր շուկայում: Զոհվել է Ասկերանի շրջանի Սարուշեն գյուղի մոտակայքում՝ հատուկ առաջադրանք կատարելիս»:
Հովհաննես Խաչիյանը 32 տարեկան էր: Ծնվել է հոկտեմբերի 3-ին, հոկտեմբերի 29-ին զոհվել է: Նա 2005-ին ընդունվել է ՀՀ ՊՆ Արմենակ Խանփերյանցի անվան ռազմական ավիացիոն համալսարանի կապի ֆակուլտետ, 2009-ին ավարտել է, հինգ տարի ծառայել է ԼՂՀ «Եղնիկներ» զորամասում, հետո տեղափոխվել է Հայաստանի տարբեր զորամասեր: 2017-ին մեկնել է ԱՄՆ՝ սպայական վերապատրաստումների: 2020-ի հունվար-փետրվարին Հունաստանում անցել է հատուկ նշանակության ջոկատների վերապատրաստման դասընթացներ: Վերջին 1,5 տարվա ընթացքում ծառայել է հատուկ նշանակության զորքերում: 2020 թվականի հոկտեմբերի 29-ին Ասկերանի շրջանի Սարուշեն գյուղի հատվածում հատուկ առաջադրանք կատարելու ընթացքում զոհվել է:
Կարդացեք նաև
Ընկերները պատմում են՝ Հովհաննես Խաչիյանը, օժտված լինելով հատուկ նշանակության գիտելիքներով ու հմտություններով, փրկել ու շրջափակումից հանել է հարյուրավոր զինվորների և սպաների: Հովհաննես Խաչիյանը հուղարկավորված է Աբովյան քաղաքի ազատամարտիկների պանթեոնում:
Հովհաննեսի եղբայրը պատմեց՝ զոհվելու օրը հատուկ նշանակության ջոկատի՝ եղբոր ընկերներն են զանգել, ասել, որ նրան տեղափոխել են հիվանդանոց:
Նարեկն ասաց, որ զոհված Հովհաննեսն իր փոքր եղբայրն էլ, մեկ քույր էլ ունեն: Խոսելով եղբոր մարդկային հատկանիշների մասին՝ Նարեկ Խաչիյանը պատմեց. «Եղբայրս միշտ ուրախ ու զվարթ է եղել, երբ զանգում էր, թեժ կետերում էլ եթե լիներ, միշտ ասում էր՝ լավ է, հանգիստ եղեք, ամեն բան լավ է լինելու, մենք լավ ենք, ոչ մի խնդիր չկա: Բոլորը սիրում էին Հովհաննեսին, մեծ ընկերություն, մեծ շրջապատ ուներ, հարազատությունով էր շրջապատված»:
Նարեկ Խաչիյանն էլ է զինվորական: Մասնակցել է 2016-ի ապրիլյան պատերազմին. «Այնուհետև զորացրվել եմ: Արցախյան 44-օրյա պատերազմի ժամանակ եղել եմ Վարդենիսի ուղղությամբ»:
Հետաքրքրվեցինք՝ ինչպե՞ս ստացվեց, որ Հովհաննեսն ընտրեց զինվորականի գործը՝ մեծ եղբոր օրինակո՞վ, նա պատասխանեց. «Գուցե; Մեր դաստիարակությունն է այդպիսին եղել. իմ պապն էլ 1945-ին է պատերազմի մասնակից եղել: Այդպես եկել է»:
Նարեկ Խաչիյանին հարցրինք՝ մեր ու մեր երկրի հետ կատարվածի մասին ի՞նչ է մտածում, նա պատասխանեց. «Մտածում եմ, որ մեր տղերքն արյան գնով պահեցին, որպեսզի թուրքը չհասնի Հայաստան, քանի որ այդ նույն բանը կլիներ Հայաստանի հողի վրա»:
Տաթև ՀԱՐՈՒԹՅՈՒՆՅԱՆ
