«Էսօր էլ զարթնեցինք, հլա գյուղը մերն ա, թորքերը իրովում չըն»,–կես կատակ-կես լուրջ Aravot.am–ի հետ հեռախոսազրույցում նշեց քարահունջցի Արթուրը։
Վերջինիս խոսքով, մի քանի օր է՝ ինչ անորոշության մեջ են։ «Չգիտենք, ոնց ա լինելու։ Հունց որ վախելիս նին, չեն կյալիս ասում՝ էսքանը իրանցն ա, որ մենք էլ մեր անելիքը իմանանք։ Պետք ա՝ կռվիք հետ բերենք»,–ասում է Արթուրը։
Քարահունջցիների խոսքով, գյուղում գտնվող ՀԷԿ–ի սեփականատիրոջն ասել են, որ ժամանակավորապես չաշխատեցնի, հնարավոր է՝ տարածքների սահմանորոշումից հետո ՀԷԿ–ը գտնվի թշնամու տարածքում։
Թե որ թվականի քարտեզներով են շարժվում՝ քարահունջցիները տեղյակ չեն։ Նրանց խոսքով՝ վիճարկելի տարածքը, որ իրենք «Յորլու բաղեր» են անվանում, «նաբուց (շատ վաղուց–Ա․Դ․) թվից քարահունջցիների տարածքն է եղել»:
Կարդացեք նաև
Ի դեպ, Քարահունջի վարչական շրջանի ղեկավար Լուսինե Ավետյանը մեզ հետ հեռախոսազրույցում նշեց, որ գյուղում իրավիճակը հանգիստ է, խուճապ չկա։ «Գյուղի ինքնապաշտպանական ջոկատը ամեն դեպքում կազմ–պատրաստ է»,–ասաց նա։
Արմեն ԴԱՎԹՅԱՆ
